Link açıqlığı

Saatnıñ esas haberi

Qırımda koronavirus pandemiyası sebebinden bir sıra sıñırlavlar yazğa qadar uzatıldı


Qırım akimiyeti hostellerniñ iş yasağını uzattı ve koronavirus pandemiyası sebebinden kirsetilgen diger sıñırlavlarnı saqlap qaldı.

Qırımnıñ Rusiye yolbaşçısı Sergey Aksenovnıñ buyruğına kirsetilgen bu deñişmeler aprelniñ 30-nda ükümet portalında derc etildi.

Vesiqada aytılğanına köre, iyünniñ 1-ne qadar teatr ve kinoteatrlerde ziyaretçi sayısı ve ekskursiya gruppalarınıñ iştirakçi sayısı 75% olaraq qala.

Bayram ve raatlıq künleri eglence ve bala merkezleriniñ işi yasaqlana. Bundan evel buyruqqa kirsetilgen deñişmeler mayısnıñ 9-nda kütleviy tedbir keçirilmesine izin bergen edi.

Rusiye kontrolindeki Qırım kurort ve turizm naziri Vadim Volçenko, mayıs bayramlarında yarımadağa milliondan çoq turistniñ kelmesi beklenile, dep bildirgen edi.

Qırımda keçken künü 97 koronavirus hastası qayd etildi. Bir künde 101 insan yahşı oldı, bütün müddet devamındp 37 521 kişi tüzeldi. Keçken künü Qırımda altı hasta koronavirustan vefat etti, pandemiya devamında 1216 insan keçindi.

Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.

COVID-19 koronavirus yuqunçı

Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.

O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.

2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.

XS
SM
MD
LG