Qayd etilgenine köre, Qırımda ava telükesi tahminen eki saat devam etti. Aqyar körfezlerinde Rusiye uquq qoruyıcıları tuman qullandı.
Ukrayına ya da Rusiye akimiyeti bu malümatnı şimdilik izaatlamadı.
Bazarertesi künü saat 11:30-da Rusiye akimiyeti Keriç köprü qapatıldı, dep bildirdi. Bir qaç daqqadan soñ Rusiye kontrolindeki Aqyar yolbaşçısı Mihail Razvojayev şeerde ava telükesini ilân etti.
Telegram kanalları Keriç boğazı civarında tuman aqqında bildire. Berilgen malümatqa köre, bu Rusiye arbiyleri qullanğan maskalamanıñ mahsus vastalarıdır. Bu rayonda Rusiye ava mudafaasınıñ işi aqqında da yazalar. Berilgen malümatqa köre, yarımada tarafına bir qaç raketa gruppası uça.
Saat 15:30-da Keriç köprü kene qapatıldı, yerli saifeler Canköyde ava mudafaası çalışa, dep haber etti. Ruste akimiyeti bu malümatnı resmiy şekilde izaatlamadı. Muarririyet malümatnı teşkerip olamay.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayına uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksenov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
