Qırımda yañı furtuna havfı ilân etildi – yaqın künleri yağanaqlar yağması ve yel quvetleşmesi tahmin etile. Bu aqta Rusiye Fevqulâde vaziyetler hızmetiniñ matbuat hızmeti bildire.
«Qırım gidrometeorologiya ve tabiat monitoringi malümatına köre, noyabrniñ 28-nde aqşam, noyabrniñ 29-nda kün devamında suvuq ava sebebinden Qırımda yağmurlar, merkeziy, cenübiy ve şarqiy rayonlarda pek küçlü yağmurlar yağacaq. Cenübiy-ğarbiy yel şimaliy-ğarbiy yelge keçip, saniyede 15-20 metr esecek, bazı yerlerde 25 metrge qadar ese bile», – dep aytıla haberde.
Qayd etilgenine köre, Qırımnıñ bazı özenlerinde suv seviyesi 0,5-1,5 metr köterilecek, lâkin telükeli seviyege çıqmaycaq.
Qırımda noyabrniñ 26-nda küçlü furtuna başladı. Farqlı regionlarda terekler tüşti, onlarnen ev zarar kördi.
Yaramay ava neticesinde tahminen 200 biñ insan Qırımda elektriksiz qaldı. «Krımenergo» Rusiye müessisesiniñ malümatına köre, çoqusı Aqmescit (42,1 biñ), Saq (24,8 biñ), Bağçasaray (21,6 biñ), İçki (15,3 biñ) ve Qarasuvbazar (15,1 biñ) rayonlarında.
Qırımnıñ Rusiye yolbaşçısı Sergey Aksenov 10 belediyede «Fevqulâde vaziyet» rejimi ilân etildi, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
