Qırımda evelden tizilgen cedvellerge köre kene kütleviy şekilde celpnameler ketirile, dep bildirdi Qırımtatar Milliy Meclisiniñ reisi Refat Çubarov.
«Qırımtatar Milliy Meclisine kelgen cedvellerniñ talili qırımtatarlar toplu yaşağan yerlerde Rusiye işğalcileri 1995-2004 seneleri doğğan, yani 18 yaşından 27 yaşına qadar erkeklerni alğanını köstere», – dep aytıla haberde.
Çubarovnıñ fikirince, «Qırımnıñ Rusiye işğalci akimiyetiniñ «küz askerligi» manaçığınen Qırım sakinlerini işğalci orduğa seferber eteler».
«KrımSOS» aq qorçalayıcı teşkilâtınıñ malümatına köre, Qırımda rusiyeliler askerlikke alınacaq yaştan büyük olğan yerli sakinlerge celpname berip, seferberlik keçirmege devam ete.
Qırımdaki Rusiye akimiyeti seferberlikniñ devamı aqqında malümatnı izaatlamay.
Sentâbrniñ 21-nde Rusiyede ilân etilgen «qısmi» seferberlikten soñ Qırım ve Aqyarnıñ Rusiye akimiyeti askerlikke aluv komissiyaları aqqında bildirdi. Aq qorçalayıcılarnıñ malümatına köre, celpnameler bir qaç biñ qırımlığa keldi.
Oktâbrniñ 31-nde Rusiye prezidenti Vladimir Putin «qısmiy» seferberlik bitti, dep bildirdi. Lâkin buyruq imzalanmadı. «Vatandaş ve ordu» Rusiye aq qorçalayıcı teşkilâtınıñ reberi Sergey Krivenkonıñ Qırım.Aqiqatqa bildirgenine köre, Vladimir Putin seferberlikni toqtatmağa istese, ferman çıqarar edi.
Ukrayına prezidentiniñ Qırım Muhtar Cumhuriyetindeki daimiy temsilcisi Tamila Taşeva Qırımda arbiy komissarlıqlar qırımtatarlar toplu yaşağan yerlerde kütleviy şekilde celpnameler bere, dep bildirdi. «Krım SOS» aq qorçalayıcı teşkilâtı qırımtatarlarnıñ seferberligi olarnıñ genotsidine yol aça bile, dep bildirdi.
Ukrayına prezidentiniñ Qırım Muhtar Cumhuriyetindeki temsilciligi Rusiye seferberligine oğrağan qırımlılar içün areket algoritmini derc etti. Rusiye ordusına çağırılmaqtan qurtulmağa istegenler içün «canlı destek» açıldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
