Oktâbrniñ 24-ü gecesi dron ücümi neticesinde Qırımda Rusiye arbiyleriniñ mobil radiolokatsion stantsiyasına zarar keldi, dep yaza «Astra» Telegram kanalı Qırımdaki Rusiye acele yardım hızmetlerindeki öz menbalarına esaslanıp.
Haberge köre, uçucısızlar Qara Acı (Olenevka) köyünden bir qaç kilometrde yerleşken Rusiye Ava mudafaasınıñ 31-inci diviziyasınıñ mobil noqtasına ücüm etmege tırıştı.
Neticede bir dron patlap, mobil radiolokatsion stantsiyasına zarar ketirdi.
Rusiye akimiyeti ve Rusiye arbiyleri bu haberni izaatlamadılar. Alternativ menbalardan faydalanıp, berilgen malümatnı tasdıqlamaq daa mümkün degil.
Yerli Telegram kanalları bildirgenine köre, Qırımda oktâbrniñ 24-ne keçer gecesi patlavlar eşitildi.
«Krımskiy veter» malümatına köre, Balıqlava rayonında Rusiye ava mudafaası çalıştı. Aqyarda eki patlav eşitildi. Bir oquyıcı «bir yerde kesen-kes darbe oldı», dep bildirdi.
Rusiye Mudafaa nazirligi Qara deñiz üzerinde gece 3 uçucısız urıp tüşürildi, dep haber ete.
Aqyarnıñ Rusiye yolbaşçısı Mihail Razvojayev tüşürilgen bir raketa aqqında bildirdi – lâkin bu malümat Rusiye Mudafaa nazirliginiñ haberinde yoq.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksenov uçucısızlarnı yarımada içün «esas telüke» dep adlandırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
