Qırımda oktâbrniñ 24-ne keçer gecesi patlavlar eşitildi, dep haber ete yerli Telegram kanalları.
«Krımskiy veter» malümatına köre, Balıqlava rayonında Rusiye ava mudafaası çalıştı. Aqyarda eki patlav eşitildi. Bir oquyıcı «bir yerde kesen-kes darbe oldı», dep bildirdi.
Rusiye Mudafaa nazirligi Qara deñiz üzerinde gece 3 uçucısız urıp tüşürildi, dep haber ete.
Aqyarnıñ Rusiye yolbaşçısı Mihail Razvojayev tüşürilgen bir raketa aqqında bildirdi – lâkin bu malümat Rusiye Mudafaa nazirliginiñ haberinde yoq.
Muarririyet bu malümatnı mustaqil şekilde teşkerip olamay. Rusiye akimiyeti Qırım yarımadasında zarar körgen Rusiye arbiy obyektleri aqqında malümatnı aydınlatmay.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksenov uçucısızlarnı yarımada içün «esas telüke» dep adlandırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
