Hatırlatamız, mayısnıñ 11-nde saba faaller Qırımnıñ İçki rayonındaki Yanış Taqıl (Zavetnoye) köyünde yaşağan Rahimovnıñ evinde tintüv keçirile, dep bildirdi.
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
«Qırımda basqılar azamğa yetti»: öldürilgen Özbekistan vatandaşınıñ ömür arqadaşı Sohiba Burhanovanıñ mahkemesi (video)
Qırımnıñ İçki qasabasında mayısnıñ 11-nde Rusiye quvetçileri tarafından öldürilgen Özbekistan vatandaşı Nabi (Ayub) Rahimovnıñ apayı Sohiba Burhanovanıñ mahkemesi olıp keçti. Onı çetel vatandaşı ya da vatandaşlıqsız şahısnıñ Rusiyege kiriş ya da bulunuv rejimi qaidelerini bozğanında (Rusiye Memuriy bozuv kodeksiniñ 18.8 maddesiniñ 1.1 qısmı) qabaatlaylar. Rusiye kontrolindeki İçki rayon mahkemesi Sohiba Burhanovanı Rusiye İç işler nazirliginiñ çetel vatandaşlarını vaqtınca tutuv merkezine yerleştirip, Rusiyeden quvmağa qarar berdi, dep bildirdi «Qırım birdemligi» cemaat birleşmesi. Qadınğa 2000 ruble memuriy para cezası da berildi. Burhanovanıñ çağına yetmegen balalarını istegen er bir insan vasiylik organlarına muracaat etip ala bile ya da balalar büyüklernen beraber Özbekistan Cumhuriyetine kete bile degen qarar çıqarıldı. Kreml kontrolindeki qadı İgor Brajnik qabaatlanğan qadınğa terciman bermeyip, 2009 senesinden berli Rusiyede yaşasa, «bu vaqıt devamında tilni ögrenmesi kerek edi», dep ayttı. Mahkeme binası ögünde qadınğa ve qorantasına qol tutmaq içün bir qaç yüz insan toplaştı. Bundan evel berilgen malümatqa köre, İçki rayonındaki Yanış Taqıl köyünde keçirilgen tintüvden soñ Nabi Rahimovnıñ ömür arqadaşı Sohiba Burhanova ve 15 yaşında oğlu Taqyuddinniñ bulunğan yeri belli degil edi.