Böylece, Qırımnıñ Rusiye akimiyeti advokatlarğa insan aqları bozulğanlarnıñ, hususan qırımtatar siyasiy mabüslerniñ menfaatlarını qorçalav imayecileriniñ özleri içün telükeli olğanını köstermege istey, dep tüşüne Yaroşenko.
Hususan böyle basqı şekilleri aqqında aytıla:
- sebepsiz tutuv;
- memuriy apis cezaları;
- memuriy para cezaları;
- sebepsiz tintüvler;
- advokat litsenziyasız qaldıruv (Lilâ Gemeci, Rustem Kâmilev ve Nazim Şeyhmambetov);
- cep telefonı bağınıñ blok etilüvi;
- qorquzuvlar;
- advokatlarğa qarşı itibardan tüşürüv informatsion kampaniyalar.
«Meselâ, bazı vaqıtları tintüv ve advokat tutuvları advokatlar müvekkillerine yardımğa ketkende ola edi. Misal olaraq , 2017 senesiniñ başında belli advokat Nikolay Polozov Qırımtatar Milliy Meclisiniñ reis muavini İlmi Umerovnıñ davasında mahkemege azırlanğanda tutulğan edi. Bir qaç kün onı sorğuda tutıp yibergenler. Bu da müvekkiline vaqtında barmasına tesir etti», – dep qayd etti talilci.
Onıñ aytqanına köre, repressiyalar körüngende qarşı cevap da kelip başladı. Başta repressiyalarğa siyasiy sebepli davalar boyunca müvekkillerini qorçalağan advokatlar oğrağan edi. Bu em memuriy, em cinaiy davalar edi. İlk böyle adiseler 2016 senesi başlağan edi.
Talilci qırımlı advokatlarğa yapılğan basqınıñ daa bir örnegini ketirdi. 2022 senesi, qırımtatarlarda keçirilgen eki büyük tintüv dalğası olğanda, mustaqil advokatlarnıñ, hususan Emil Kurbedinovnıñ cep telefonları blok etilgen edi. Neticede qorantalar advokatlarnen bağlanıp olamadı, ve advokatlar tintüv yerlerine kelip, uquqiy yardım yetiştirip olamadı.
«Bu tintüvler aqqında bir qaç saattan soñ belli oldı. Bular qorquzuv ve advokatlarnı siyasiy mabüslerniñ ve insan aqları bozuluvları qurbanlarınıñ menfaatlarını qorçalamaqtan vazgeçmeleri içün yapıla», – dep ayttı Yaroşenko.
Fevralniñ 15-nde Aqmescitte advokat Emil Kurbedinovnıñ tutuluvı aqqında belli oldı. Advokat FSB binasında tahqiqat tedbirlerinde edi, dep tarif etti. Bina çıqışında onı «E Merkeziniñ» hadimleri tutıp, polis bölügine alıp ketti. Soñra advokat yiberildi, oña qarşı Rusiye Federatsiyası Memuriy uquq bozuvları kodeksiniñ 13.15 maddesi (9-ıncı qısmı) – «Kütleviy malümat serbestligini suistimal etüv» maddesine istinaden protokol tizildi.
Kurbedinov tutulğanını «Rusiye mahsus hızmetleriniñ Qırımdaki advokatlarğa daa bir basqı ıntıluvı» dep adlandırı. «Bu dava ne içün açılğanını yahşı bilem», – dep ayttı advokat, ileride tafsilâtlar bermege vade etip.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
