İşğal etilgen Qırımda Rusiye akimiyeti ealini haberdar etüv sistemasını quvetleştire – bildirüv sistemalarınıñ ağı kenişletile, tehnik imkânları quvetleştirile. Bu aqta Qırım.Aqiqatqa #LiberateCrimea Qırımnı işğalden qurtaruv halqara kampaniyasınıñ faali gizli qalmaq şartınen bildirdi.
Faalniñ malümatına köre, haberdar etüv sistemalarınıñ quvetleşüvi Ukrayina Silâlı quvetleriniñ işğal etilgen Qırım yarımadasına qarşı ücümlerniñ kenişlemesi neticesinde kerçekleşe.
"İşğalci akimiyet vaziyet olar içün daa beter olacağından emin oldı – Ukrayina Silâlı quvetleriniñ Qırımnıñ arbiy ve kritik infrastrukturasına qarşı darbeleri daa sıq ve muvafaqetli ola, Rusiye ava mudafaasınıñ iş neticelerinden Qırımnıñ mesken yerlerinde adiy sakinler daa sıq zarar köre. Şunıñ içün Qırımnıñ bütün köy mekteplerinde yañı bildirüv sistemalarınıñ qoyulmasına para berildi. Martnıñ 4-nde Qırımda ealini haberdar etüv sistemalarınıñ teşkerilüvi planlaştırıla. Aqmescitte de sirena sesleri eşitildi, amma pek qısqa edi, şeer sakinlerini telâşlandırmamaq içün, çünki Aqmescitteki sığınaqlar tek formal bar. Söz sırası, bildirüv sistemalarınıñ
keçken teşkerilüvi vaqtında Qırımda, Aqmescitte sirena çalıştırılmadı, Kefede ise insanlar ücüm vaqtında bile şeerniñ soqaq bildirüv sisteması sessiz qala, dep şikâyet ete", – dep haber etti faal Qırım.Aqiqatqa.
Qırımda martnıñ 4-nde bildirüv sisteması teşkerile.
"Teşkerüv vaqtında "Er kes diqqat" sözlerinen elektrik sirena çalıştırılacaq ve tele- ve radio kanallarında teşkerüv aqqında haber etilecek", – dep bildirdi Qırımnıñ Rusiye Fevqulâde vaziyetler hızmeti.