Qırım işğali vaqtında Rusiye taqip etilgen qırımtatarlar ve Ukrayina tarafdarı yarımada sakinlerini qorçalağan dört mustaqil advokatnı litsenziyasız qaldırdı. Bu aqta Qırımtatar resurs merkezi haber ete.
«İşğal vaqtında rusiyeliler dört qırımlı advokat Lilâ Gemeci, Rustem Kâmilev, Nazim Şeyhmambetov ve Aleksey Ladinni litsenziyasız qaldırdı», – dep aytıla haberde.
Bundan ğayrı, aq qorçalayıcılarğa qarşı tintüv, memuriy apis cezaları, para cezaları ve tutuvlar qullanıldı.
Qırımtatar resurs merkezi hatırlatqanına köre, 2018 senesi Rusiye kontrolindeki Aqmescitniñ Kiyev rayon mahkemesi advokat Emil Kurbedinovnı 2013 senesi VKontakte içtimaiy ağında ekstremist paylaşuv sebebinden 10 künge memuriy apiske aldı. Rusiye uquq qoruyıcıları ofisinde tintüv keçirip, tehnikasını aldı.
2021 senesi advokat Edem Semedlâyev Ekstremizm ile küreş merkeziniñ bölük yolbaşçısınıñ açıq ses qaydınıñ yapılmasını toqtatmaq ve ekstremist tatularınıñ olıp olmağanını teşkermek talabına riayet etmegeni içün 12 künge apiske alındı ve 4 biñ ruble para cezasını aldı.
2022 senesi mayıs ayında ekstremizm ile küreş merkeziniñ hadimleri Aqmescitte Semedlâyevni içtimaiy ağdaki paylaşuv sebebinden tuttı, asılında ise advokat bir şey paylaşmadı, anda başqa insan tarafından qayd etildi. Mahkeme bitken soñ uquqçığa 75 biñ ruble para cezası berildi.
Rusiye uquq qoruyıcıları Semedlâyevniñ imayecisi olğan advokat Nazim Şeyhmambetovnı da tuttı, oña 6 kün memuriy apis cezası berildi. Soñra zenaatdaşlarını qorumaq içün Rusiye mahkemesine kelgen uquqçılar Ayder Azamatov ve Emine Avamileva tutuldı.
2023 senesi oktâbrniñ 13-nde Qırımda advokat Aleksey Ladin tutuldı. Tintüvde advokat gizliligi olğan vesiqalar alındı. Ladin içtimaiy ağlarda yasaqlanğan timsallerni köstergeni içün ve cenkke qarşı yazğanları içün 14 künge apiske alındı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
