Qırımda koronavirus hastaları içün boş yer sayısınıñ vaziyeti bayağı qıyın qala, bugünki künde umumiy sayıdan 15% miqdarında yedek şekillendirildi, dep bildirdi Qırımnıñ Rusiye ükümetiniñ sağlıq naziriniñ muavini Anton Lâskovskiy.
«Vaziyet qıyın qala. Serbest yer fondu bar, amma büyük yedek yapmaymız, çünki koronavirus hastaları içün zaten çoq yer ayırıldı. Amma tahminen 15% yedek yer saqlamağa tırışamız. Raqam olaraq 500 yer: umumen 3700 yer, 3200-ü tolu. Yedegimiz bar, amma planlaştırılğan yardım kösterilüvine pek tesir ete. Bu yerlerni boş yerden almaymız», – dep añlattı o, «RİA Novosti Krım» neşirine.
Onıñ aytqanına köre, şimdi hastahaneden çıqarılğan hastalarnıñ sayısı hastahanege yañı kelgenlernen aman-aman teñ ola.
«Şimdi er kün tahminen 150-200 kişi hastahanege alına ve hastahaneden çıqarılğanlarnıñ sayısı aman-aman aynı. Eksilecek, dep ümüt etemiz, 20% yer yedegi olsa yahşı, amma şimdilik imkânsız», – dep qayd etti memur.
Keçken afta Qırımdaki Rospotrebnadzor idaresi Qırımda iyülniñ 28-nde COVID-19 hastaları içün boş yerlerniñ sayısı 13% ola, dep bildirgen edi.
İyülniñ 17-nde Qırımda koronavirus yuqunçınıñ tarqaluvınen bağlı yañı sıñırlavlar kirsetildi. Bundan evel Qırımda aman-aman er kün koronavirus hastalarınıñ sayısında antirekord qayd etilgen edi.
Qırımda avgustnıñ 1-nde koronavirus yuqunçınıñ tarqaluvınen bağlı yañı sıñırlavlar çalışıp başladı. Laf birinciden bala lagerleri aqqında kete.
Qırım ve Aqyardaki Rospotrebnadzor idaresiniñ malümatına köre, yarımadada eki aftadan berli COVID-19 hastalarınıñ sayısına köre Sudaq lider ola.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
