Qırımda keçken künü 245 COVID-19 hastası ve 16 vefat qayd etildi. Bir kün evelsi olğan raqamlardan çoq oldı. Bu aqta Rusiye kontrolindeki Qırımnıñ sağlıq nazirligi haber ete.
Er künlik monitoring malümatına köre, 4500 insan (COVID-19) ambulator tedaviylevde buluna, 2662 kişi (COVID-19 ve pnevmoniya) hastahanede yata.
Qırım ve Aqyardaki Rospotrebnadzor idaresi 75437 COVID-19 hastasını qayd etti. Tüzelgen 65178 kişi hastahaneden çıqarıldı. Pandemiya devamında Qırımda 2442 insan COVID-19-dan vefat etti.
Sentâbrniñ 16-nda Qırımda 237 yañı koronavirus hastası qayd etildi, 14 insan hastalıqtan vefat etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
