Qırımda Rusiye uquq qoruyıcıları tarafından casuslıqta qabaatlanğan Bağçasaray rayonınıñ sakini tutuldı. Bu aqta Rusiye kütleviy haber vastaları Rusiye Federatsiyası FSB matbuat hızmetiniñ malümatına esaslanıp haber ete.
Berilgen malümatqa köre, er adam Ukrayina arbiylerine Rusiye ordusı ve tehnikasınıñ Qırım yarımadasındaki mevzilerini bildirgen, internette ise diversion işler yapmağa çağırğan eken. Cenk vaziyetinde bu malümatnıñ doğrulığını teşkermek zor.
Tutulğannıñ adı ve soyadı aytılmay. Rusiye kütleviy haber vastaları Rusiye FSBsi çıqarğan videonı derc etti. Anda beti qapatılğan adam Rusiye uquq qoruyıcıları bergen malümatnı kamera ögünde tasdıqlay. Onıñ aytqanına köre, 2023 senesi aprel ayında o, Aqyarnıñ yaldağan qoraları, ava mudafaası ve Aqyar körfezinde bulunğan radioelektron staniyalar aqqında malümat berdi. Bu videonıñ basqı altında çıqarılması mümkün.
Al-azırda Rusiye kontrolindeki Aqmescit Kiyev rayon mahkemesi onı eki ayğa apiske aldı.
Ukrayina arbiyleri ve mahsus hızmetleri bu malümatnı izaatlamadı.
Aq qorçalayıcılar devlet hainligi, Ukrayina ile işbirligi, casuslıq ve diversiya maddelerine istinaden davalarnıñ sayısı artacaq, dep tahmin ete. Şimdi FSB böyle davalarnı aman-aman er kün aça, 2014 senesine qadar ise olarnıñ sayısı yılda eñ çoq 10 edi.