Qırımda avgustnıñ 26-nda 15 insan COVID-19-dan vefat etti, dep bildire Qırımnıñ Rusiye sağlıq nazirligi. Rusiye akimiyeti 329 yañı COVID-19 hastasını qayd etti, dep bildire avgustnıñ 27-nde Qırımnıñ Rusiye yolbaşçısı Sergey Aksenov içtimaiy ağlardaki saifelerinde.
«277 hasta tibbiy yardım içün muracaat etkende qayd etildi, 51 kişi daa evel qayd etilgen hastalarnen alâqada oldı, 1 hasta çetelden keldi. Bir künde 372 insan tüzeldi, bütün müddet devamında 59 149 kişi yahşı oldı», – dep bildirdi Aksenov.
Qırımnıñ Rusiye sağlıq nazirliginiñ malümatına köre, bir kün evelsi koronavirustan vefat etkenlerniñ sayısı bir kişi çoq edi.
Hatırlatamız, avgustnıñ 26-nda saba 331 yañı koronavirus hastası qayd etilgen edi.
Avgustnıñ 25-nde Qırım ve Aqyardaki Rospotrebnadzor idaresiniñ yolbaşçısı Natalya Penkovskaya koronavirus tarqaluvı ile küreş operativ ştabınıñ toplaşuvında Yañı Qapu rayonı, Yalta, Aluşta, Aqşeyh rayonı, Kefe, Canköy rayonı ve Kezlevde COVID-19 hasta sayısı yüksek seviyede qala, dep bildirdi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
