Qırımtatar resurs merkezi Qırımda olğan siyasiy mabüs sayısınen bağlı malümatnı yañarttı.
«Qırımtatar resurs merkeziniñ malümatına köre, bugünki künde siyasiy mabüs ve işğalci akimiyet tarafından taqip etilgenlerniñ sayısı 230 insan ola, 162-si – qırımtatarıdır», – dep aytıla haberde.
Aq qorçalayıcılar Qırımda taqip etilgenlerni 5 kategoriyağa ayırdı:
- Mahküm etilip koloniyada cezasını çekkenler (63 insan, 40-ı – qırımtatarı);
- Sıñırlavları ve sınav müddeti olğanlar (34 kişi, 19-ı – qırımtatarı);
- SİZOda olğanlar (52 insan, 45-i – qırımtatarı);
- Azat etilgenler (49 insan, 32-si – qırımtatarı);
- Taqip etilgenler (32 insan, 26-sı – qırımtatarı).
Qırımtatar resurs merkezi yarımadada hırsızlanğan insanlarnı da saydı. Teşkilâtnıñ malümatına köre, 21 insan hırsızlandı, 15-i qırımtatarı ola. Bu kategoriya qıdıruvğa ilân etilgenler (9 insan, episi qırımtatarı) ve qıdıruvğa ilân etilmegenlerge (12 kişi, 6-sı – qırımtatarı) bölüne.
Hatırlatamız, KrımSOS teşkilâtınıñ malümatına köre, 2014 senesinden berli Qırımda 44 insan hırsızlanuvı qayd etildi, 19 kişi sağ tapıldı, üç insan apishanede tapıldı, altı insan ölü tapıldı. 15 kişiniñ bulunğan yeri bugünge qadar belli degil.
Ukraina prezidenti Volodımır Zelenskıy Qırım kütleviy haber vastalarına intervyü berip, Kreml ukrainalı siyasiy mabüslerni, hususan qırımlılarnı Rusiye apsinden azat etüv esnasını soza, dep aytqan edi.
Ukraina Yuqarı Radasınıñ insan aqları vekâletlisi Lüdmila Denisova, Ukraina ve Rusiye arasında tutulğan şahıslarnı deñişüv muzakereleri Rusiye akimiyetiniñ areketleri neticesinde aman-aman toqtatıldı, dep qayd etken edi.
Advokat Nikolay Polozovnıñ Qırım.Aqiqatqa bildirgenine köre, Rusiyede ve işğal etilgen Qırımda apiske alınğanlarnıñ advokatları ve tuvğanları azat etilüvlerinde bir ilerilev körmey. Polozovnıñ malümatına köre, al-azırda 130-dan çoq Ukraina vatandaşı Rusiyede ya da Qırımda tutula.
Rusiye apsinde tutulğan qırımlılar
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
Ukraina Yuqarı Radasınıñ İnsan aqları vekâletlisi Lüdmila Denisovanıñ kâtibiyeti 2020 senesi noyabr ayında Rusiye tarafından siyasiy sebeplerden taqip etilgen insanlarnıñ sayısı 130 ola, dep bildirgen edi.
Qırım aq qorçalayıcı gruppasınıñ malümatına köre, 2020 senesi oktâbr ayınıñ soñuna qadar eñ az 110 kişi Qırımda siyasiy sebepli ya da diniy cinaiy taqipler çerçivesinde azatlıqtan marum etildi.
Siyasiy mabüslerge qol tutuv programmasınıñ reberi, «Memorial» aq qorçalayıcı merkeziniñ şura azası Sergey Davidisniñ bildirgenine köre, merkezleriniñ cedvelinde 315 insan bar, 59-ı – qırımtatarıdır.
Aq qorçalayıcılar ve advokatlar bu cinaiy davalarnı siyasiy, milliy ya da diniy sebeplerden taqip dep adlandıra. Rusiye akimiyeti bu sebeplerni inkâr ete.
