2025 senesiniñ ilk üç ayı içinde işğal etilgen Qırımda 13 tintüv qayd etildi, 7-si tamır qırımtatar halqınıñ vekilleri yaşağan evlerde oldı. Bu aqta Qırımtatar resurs merkezi bildire.
Qayd etilgenine köre, 2024 senesiniñ ilk üç ayında daa yüksek raqam olğan edi, o vaqıt 33 tintüv keçirilgen, 28-i qırımtatarlarnıñ evlerinde edi. 2023 senesiniñ ilk üç ayında 21 tintüv qayd etilgen edi, 19-ı qırımtatarlarnıñ evlerinde oldı.
«Böylece, adiselerniñ sayısı biraz eksilse de, siyasiy ve diniy sebeplerden taqip yarımada işğali başlağanında berli deñişmey», – dep aytıla haberde.
Qırımtatar resurs merkezi hatırlatqanına köre, Rusiye uquq qoruyıcıları tintüv keçirgende insanlarnıñ aqlarını boza – hususan mulklerine zarar ketire, ev saibi olmağanda tintüv keçire, yasaqlanğan edebiyatnı gizliden qoya.
Daa evel Qırımtatar resurs merkezi bildirgenine köre, Qırım ilhaqı vaqtında aq qorçalayıcılar 399 siyasiy mabüsni ve cinaiy davalar boyunca taqip etilgenlerni qayd etti, olardan 241-i qırımtatarı ola.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
