Keçken künü Qırımda 140 koronavirus hastası qayd etildi, dep bildirdi Qırımnıñ Rusiye yolbaşçısı Sergey Aksenov.
«102 hasta tibbiy yardım içün muracaat etkende qayd etildi, 37 insan daa evel qayd etilgen hastalarnen alâqada oldı, 1 hasta çetelden keldi», – dep bildire Aksenovnıñ aytqanlarını Qırım ükümetiniñ matbuat hızmeti.
Onıñ malümatına köre, bir künde yahşı olğan insanlarnıñ sayısı 20 oldı, bütün müddet devamında 41 672 insan tüzeldi.
Qırımnıñ Rusiye sağlıq nazirliginiñ malümatına köre, keçken künü dört hasta koronavirustan vefat etti, umumen pandemiya vaqtında 1422 insan keçindi.
«563 insan (COVID) ambulator tedaviylevde, 1752 kişi (COVID ve pnevmoniya) hastahanelerde buluna», – dep aytıla müessise haberinde.
Bir kün evelsi Qırımda 132 yañı koronavirus hastası aqqında haber etken ediler.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
