Qırımda gece patlavlar eşitildi, Ukrayina dronları uçtı, Rusiye mobil ateş gruppaları çalıştı, dep haber ete Rusiye akimiyeti ve yerli Telegram kanalları.
Aqmescit, Kefe ve Balıqlavada patlav ve atış sesleri eşitildi. Aqmescit, Saq (Novofedorovka qasabası), İçki ve Bağçasaray rayonlarında (Efendiköy (Ayvovoye) ve Arançı (Suvorovo) ve Aqyarda dronlar uçtı ve mobil ateş gruppalarınıñ atışları oldı.
"Krımskiy veter" Telegram kanalı haber etkenine köre, parlaq ateşli patlav saat 02:40-ta oldı, tahminen, Tavrik TES civarında (Mamaq (Strogonovka) köyü).
"Krımskiy veter" abuneciniñ malümatına esaslanıp yazğanına köre, "Büyük Yaltada saba 4-lerde küçlü patlav eşitildi ve o vaqıtta berli Qırımnıñ Cenübiy yalısı ışıqsız qala". "Krımskiy veter" "Büyük Yaltadaki Yaşağı Kikineiz (Ponizovka) qasabasında küçlü elektrik aststantsiyası ve Rusiye Fevqulâde vaziyetler hızmetiniñ binasında yanğın qayd etildi", dep bildirdi.
"Krımskiy veter" monitoring gruppası bildirgenine köre, Aqmescit civarındaki Acı Qal (Çistenkoye) köyü yanında OOO "PUD" logistik merkezi yanında bina yana". Yanğan bina ne binası ve anda ne bar belli degil". Sabağa doğru logistik merkez civarında yanğın quvetleşti.
Aqyarnıñ Rusiye akimiyeti ava telükesini ilân etip, "Rusiye arbiyleri Ukrayina Silâlı quvetleriniñ ücümini keri qaytara, ava mudafaası ve mobil ateş gruppaları çalışa", dep bildirdi.
Rusiye ve Ukrayina arbiyleri ücümni şimdilik izaatlamadılar.
Qırım.Aqiqat Cenk vaziyetinde bu malümatnı mustaqil şekilde teşkerip olamay.
İyün ve iyül aylarında Qırımdaki arbiy ve energetika obyektleri, Rusiye logistik yolları Ukrayina Silâlı quvetleriniñ eñ büyük ücümlerine oğray. Er kün yañı nişanlarğa darbeler aqqında haber etile, Qırımda yaqarlıq qıtlığı sebebinden adiy insanlarğa benzin satılmay, elektrik energiyası cedvelge köre berile, Keriç köpründe ise nevbetler bar. Bala şifahane müessiseleri ve lagerleri sentâbr ayına qadar raatlanğanlarnı qabul etmey.
İyulniñ başından Ukrayina Uçucısız sistemalar quvetleri er kün Azaq ve Qara deñizlerinde Qırımğa yaqarlıq da taşığan Rusiye "kölge flotunıñ" tankerleri ve diger gemilerine darbe endirgenine dair esabat bere.
Ukrayina Mudafaa naziri Mıhaylo Fedorov darbelerniñ maqsadını añlattı – "Qırım dronlarnen izolâtsiya etile". Onıñ aytqanına köre, bu "rusiyeliler içün pek beklenilmegen aqibetlerge yol aça bile".
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.