Qırımda bir yıl içinde vefat etkenlerniñ sayısı aman-aman eki qat arttı, dep qayd eteler. Bu aqta Rusiye kontrolindeki Qırım statistika idaresi (Krımstat) bildire.
«2021 senesiniñ yanvar-avgust aylarında cumhuriyette 11902 insan doğdı, 21863 kişi vefat etti. 2020 senesi yanvar-avgust aylarına baqılğanda eali 4114 insan, ya da 1,7 qat arttı», – dep aytıla müessise haberinde.
Statistika Qırımda doğğanlarnıñ sayısı eksile, vefat etkenlerniñ sayısı ise arta, dep köstere.
«2021 senesi yanvar-avgust aylarında doğğanlarnıñ sayısı 2,5% eksildi, vefat etkenlerniñ sayısı ise 21,1% arttı. 2021 senesi yanvar-avgust aylarında 1 yaşına qadar vefat etken balalarnıñ sayısı 67 oldı, 2020 senesi yanvar-avgust aylarında da öyle edi», – dep aytıla Krımstat malümatında.
Keçken sene de Qırımda doğğanlarnıñ sayısı eksildi, dep qayd etilgen edi.
Azatlıq Radiosınıñ daa evel bildirgenine köre, Rusiye ükümetiniñ Rusiye inkişafınıñ milliy maqsadlarına irişüv planına köre, 2021 senesiniñ neticelerine köre memleket ealisi 535,5 biñ insan eksilecek, 2022 senesi ise 533,4 biñ kişi eksilecek. Keçken seneniñ neticelerine köre, Rusiye ealisi 17 yıl içinde ilk sefer 577,6 biñ insan eksildi. 2021 senesi yanvarniñ 1-nde eali sayısı işğal altındaki Qırımnen beraber 146,17 million oldı.
