Ukraina Yuqarı Radasında Ukraina sıñırlarında Rusiye telükesi bar olğanından BM, Avropa Parlamenti, Avropa şurası parlament assambleyaları, OSCE, NATO, Qara deñiz iqtisadiy işbirligi teşkilâtına muracaat qararlarınıñ leyhası qabul etildi.
Qarar leyhasınıñ qabul etilüvine 326 halq deputatı qoltuttı.
Vesiqada Yuqarı Rada Rusiyeni Ukraina sıñırlarından arbiy küçlerni ve silânı çekmesine ve olarnı vaqtınca işğal etilgen topraqlardan çıqarmasına, Ukraina deñizlerinde arbiy talimlerni toqtatmasına ve halqara deñiz ticareti içün manialarnı lâğu etmesine çağıra.
Bundan ğayrı, leyhağa köre, parlament halqara teşkilâtlar, çetel devletleriniñ ükümetleri ve parlamentlerinden Rusiyege qarşı istilâcı devletni tutuv ve Avropa telükesizlik mimarcılığınıñ saqlavı olaraq sanktsion basqını quvetleştirmesini rica ete.
Yuqarı Rada, Ukraina topraq bütünligi ve suverenitetine halqara seviyede tanılğan sıñırlarda qoltutmağa ve Rusiye başlatqan silâlı zıddiyetni halqara uquq normaları ve printsipleri esasında muzakere formatlarından faydalanıp, barışıq yolunen al etmege teklif ete.
Parlament halqara teşkilâtlarğa ve çetel parlamentlerdeki zenaatdaşlarına Ukrainağa mudafaa yardım kösterilüvini quvetleştirmege ve tezleştirmege tevsiye ete.
Qarar leyhasınıñ müellifleri Yuqarı Rada reisi Ruslan Stefançuk, birinci muavini Oleksandr Kornienko ve spiker muavini Olena Kondratük ola.
Bıltır küzden berli kütleviy haber vastaları istihbaratqa esaslanıp, Ukraina sıñırındaki Rusiye arbiyleri aqqında bildirip başladı. ABD ve Ğarp memleketleri Moskva silâlı ücüm azırlay dep, Ukrainağa arbiy yardım kösterip başladılar. Kreml, ücüm etecegini inkâr ete.
Fevralniñ 15-nde Rusiye Ukraina sıñırındaki ordusınıñ bir qısmı bulunuv yerlerine qaytacaq, dep bildirdi.
Rusiye Mudafaa nazirliginiñ beyanatı mustaqil menbalar tarafından şimdilik tasdıqlanmadı.
