Qırım ve Aqyarda esas Ukrainada Rusiyeniñ ücümi vaqtında ölgen eñ az 32 Rusiye arbiyi defin etildi. Bu aqta «Ğolos» fraktsiyasından Ukraina halq deputatı Rustem Umerov Facebookta bildirdi.
«Endi eñ az 32 Rusiye askeri defin etildi, 24-ü, büyük ihtimalnen, Ukraina vatandaşı edi», – dep yazdı Umerov.
O, qırımlılarnı Rusiyeniñ Ukrainağa qarşı cenkte iştirak etmemege, arbiy komissarlıqqa celpname almamağa çağırdı.
«Rusiye Federatsiyasınıñ ordusına zornen alğan olsalar: Ukraina akimiyeti kontrol etken topraqqa yollasalar, birden esirlikke teslim oluñız ve Qırımdan ya da işğal etilgen Donetsk ve Lugansk vilâyetleriniñ ayrı rayonlarından olğanında bildiriñiz», – dep qoştı Umerov.
Al-azırda Aqyarnıñ Rusiye akimiyeti esas Ukrainada Aqyarda yaşağan eñ az 24 Rusiye arbiyi öldi, dep bildirdi.
Qırımnıñ Rusiye yolbaşçısı Sergey Aksenov Rusiyeniñ Ukrainağa ücüm etkeni neticesinde ölgen arbiyler arasında qırımlılar olğanını ayttı, amma sayısını aydınlatmadı. Rusiye arbiyleri Aluşta ve Yaltada defin etildi. Eñ az eki Rusiye arbiyi Keriçte defin etildi.
Aprelniñ 6-nda Ukraina Silâlı quvetleriniñ Baş ştabı Rusiye Ukrainağa qarşı cenkte tahminen 18 600 arbiyini coydı, dep bildirdi.
Martnıñ 25-nde Rusiye Mudafaa nazirligi bu aynıñ başından ilk sefer Rusiye ordusınıñ ğayıpları aqqında malümatnı yañarttı. Olarnıñ malümatına köre, 1351 Rusiye arbiyi öldi, 3825 arbiy yaralandı.
Martnıñ 30-nda ABD devlet kâtibiniñ muavini Viktoriya Nuland Rusiyeniñ Ukrainağa qarşı cenkte 10 biñden çoq Rusiye arbiyi öldi, dep haber etti.
Rusiye ordusınıñ Ukrainada körgen zararlarını tasdıqlaycaq mustaqil bir menba şimdilik yoq.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net/. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
