Keçken künü Qırım ve Aqyarda 27 insan koronavirustan vefat etti. Bu aqta Qırımnıñ Rusiye Sağlıq nazirligi ve Aqyar ükümeti aydınlatqan malümatta aytıla.
Sağlıq nazirligi qayd etkenine köre, yarımadada 107 yañı COVID-19 hastası qayd etildi, 195 kişi yahşı oldı, 25 insan vefat etti.
Aqyar ükümeti 49 yañı koronavirus hastası ve eki vefat aqqında bildirdi. 104 insan tüzeldi.
Bundan evel akimiyet Qırım ve Aqyarda koronavirustan vefat etken 26 insan aqqında bildirgen edi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
