Qırımda soñki künde 122 yañı COVID-19 hastası, Aqyarda 108 hasta qayd etildi, dep bildire Qırım ve Aqyarnıñ Rusiye ükümetiniñ saytları.
Rospotrebnadzor malümatına köre, umumen Qırımda 128 141 COVID-19 hastası qayd etildi. Keçken künü Qırımdaki laboratoriyalar 4 562 insannı teşkerdi. Bir künde 120 insan yahşı oldı, bütün müddet devamında 119 541 kişi tüzeldi. Bir künde 11 hasta vefat etti, pandemiya başlağanından 4 568 insan vefat etti.
Aqyarda tüzelgen 55 insan hastahaneden çıqarıldı. 65 yaştan 93 yaşqa qadar 4 insan vefat etti. Rospotrebnadzor malümatına köre, umumen Aqyarda 53 730 kişi yañı koronavirus yuqunçına oğradı. 50 913 insan tüzeldi, 1900 kişi vefat etti.
Tünevin Qırımda 110 yañı COVID-19 hastası, Aqyarda 96 hasta qayd etildi.
Qırımda yanvarniñ 17-nden itibaren aş müessiseleri, alış-veriş merkezleri, salon, sauna, fitnes-merkezleri, teatr ve kinoteatrlerde ziyaretçilerden kene QR-kodlar talap etilmeli.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
