Aqyarda tatu ustasını ukrayınce «Qırım – Ukrayınadır» tatusını yapqanı içün afu soramağa mecbur ettiler.
Rusiye tarafdarı qırımlı bloger Aleksandr Talipovnıñ Telegram kanalında derc etilgen videoda tatu ustası Olesâ Golubenko peşman olğanını, «mahsus arbiy operatsiyağa» (Rusiye Ukrayınağa qarşı cenkini böyle adlandıra) qoltutqanını ve ceza çekmege azır olğanını ayta.
Golubenko internetteki saifesinde tatu resmini iş örnegi olaraq derc etti. Bundan soñ içtimaiy ağlarda Rusiyege qoltutqan qanallar ustanı şikâyet etip başladı. «Mediazona» neşiri tahmin etkenine köre, internette çıqqan qavğadan soñ Golubenkonı uquq qoruyıcı organlar tuttı, polis bölüginde ise Rusiye ordusını «itibardan tüşürgeni» içün protokol tizildi. Qırım.Aqiqatnıñ bu malümatnı tasdıqlaycaq mustaqil izaatları yoq.
Rusiyede ve işğali altındaki topraqlarda Ukrayınağa qoltutqan sakinler taqip etile. Rusiye tarafdarı bloger Aleksandr Talipov Telegram kanallarında Ukrayınağa qoltutqan qırımlılarnıñ şahsiy malümatını derc ete. Talipovnıñ şikâyetleri neticesinde qırımlılarnı Rusiye ordusını «itibardan tüşürgeninde» qabaatlap, memuriy ve cinaiy mesüliyetke çekeler. Ukrayına prokuraturası Talipovğa qarşı «milletlerara nefret doğuruv» maddesine istinaden cinaiy tahqiqat başlattı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
