«Qırım – Ukrayinadır. Noqta. Ukrayina tarafında Mudafaa Quvetlerimiz, ortaqlarımız, BM nizamnamesi ve halqara uquq bar», – dep qayd etti Tış işler nazirligi.
Anda Qırım «Avropa havfsızlıq mimarlığınıñ ağırlıq merkezidir», dep qoşuldı, onıñ tolusınen tiklenmesi tek Ukrayinanıñ bütün topraqları, şu cümleden Qırım da işğalden azat etilgen soñ mümkün.
«Rusiyeni halqara uquqqa ve BM Nizamnamesine sayğı köstermege, ordusı ve silâsını Ukrayina toprağından çıqarmağa ve onıñ topraq bütünligini ğayrıdan tiklemege mecbur etmek, Rusiyeni Ukrayinağa qarşı istilâsı ve cinayetleri sebebiden mesüliyetke çekmek içün ortaqlarımızdan qararlı bir şekilde desteklerini bekleymiz», – dep qayd etti Tış işler nazirligi.
Poloniya tış işler naziri Radoslav Sikorskiy Kyivdeki er yıllıq YES 20-nci körüşüvinde Ukrayina ve Rusiye arasında barışıq şartları muzakere etilse, Qırımnıñ emiyeti büyüktir, dep ayttı. O, Qırımnı «kimler qanuniy sakinleri ola ve ilâhre teşkermek içün adaletli bir referendum azırlamaq missiyasınen» BM mandatına bermege de teklif etti.
Ukrayina prezidenti ofisiniñ yolbaşçısı Andriy Yermak ve Qırımtatar Milliy Meclisi bu teklifni tenqit ettiler. Rusiye Sikorskiyniñ teşebbüsini «zaten ölü» ve «manasız» dep adlandırğanlar.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
