«Bu seneki zirve qırımtatar halqı sürgüniniñ 80-inci yılına kele. Ana vatanlarından zornen çıqarılğan qırımtatar soydaşlarımıznıñ maruz qalğan facianıñ acısı 80 yıldır keçmey, yaraları qapanmağandır. Türkiyeniñ ilk künden berli qarşı çıqqan ve tanımağan Qırımnıñ ilhaqı, olğan acılar daa da terenleşti. Ukrayinanıñ topraq bütünligine, suvereniteti ve mustaqilligine köstergen destegimiz sarsılmaz. Qırımnıñ Ukrayinağa qaytarılması, halqara uquqnıñ bir talabıdır. Qırımnıñ tamır halqlarından olğan qırımtatar soydaşlarımıznıñ telükesizligi ve eyiallığı tış siyasetimizniñ birinci vazifelerimizden biridir», – dedi Erdoğan.
Onıñ aytqanına köre, «Ukrayina ükümeti qırımtatarlarnıñ aqlarını pekitmek içün kirsetken uquq normalarından memnün».
«Qırımtatarlar ana vatanlarında serbest, telükesiz ve barışıq bir yaşayış aqqına saipler. Qırımtatar Milliy Meclis reisiniñ birinci muavini Nariman Celâlnıñ aman-aman üç yıllıq esirlikten soñ iyün ayında azat etilmesi quvandıra. Asan ve Aziz Ahmedov (Türkiye prezidenti ağa-qardaş Ahtemovlar aqqında aytmağa istegendir) qardaşlarınen beraber bütün qırımtatarlarnıñ tez vaqıtta azatlıqqa çıqmasını bekleymiz. Cenkniñ Ukrayina topraq bütünligi, suvereniteti ve mustaqilligi esasında adil ve qaviy barışıqnen bitmesi samimiy tilegimizdir», – dep qoştı Türkiye prezidenti.
Erdoğan muracaat soñunda «Qırım platforması» çerçivesinde yapılğan iş Qırım, Ukrayina ve Qara deñiz regionında barışıqnı temin etüv halqara ğayretlerine yardım etecek, dep ümüt etkenini bildirdi.
Ukrayina prezidenti Volodımır Zelenskıy «Qırım platforması» sammiti sentâbrniñ 11-nde ötkerilecek, dep bildirdi. Qırımnı işğalden azat etüv halqara meydançığınıñ iştirakçileri dördünci kere körüşecekler. Tedbir gibrid formata keçirilecek: musafirler em online, em offline qoşulacaq.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
