Qırımda ukrayin yırlarını diñlegen üç erkek tutuldı, dep haber ete Rusiye tarafdarı bloger Aleksandr Talipovnıñ «Krımskiy SMERŞ» Telegram kanalı.
Berilgen malümatqa köre, insanlar «Okean Elzı» gruppasını ve Rusiye prezidentini aqaretlegen yırlarnı qoyğan eken.
«Tutulğanda bu şahıslar polis hadimlerine tirendi. Şahıslar cemaat nizamını bozıp, Rusiye prezidentini aqaretlegen ukrayin yırlarını sesli diñledi», – dep aytıla haberde.
«Krımskiy SMERŞ» tutulğanlarnıñ afu sorağan videolarını derc etti. Olar basqı altında çıqarılğandır.
Rusiyede ve onıñ tarafından işğal etilgen topraqlarda quvetçiler Ukrayına tarafdarlarını taqip ete. Rusiye tarafdarı qırımlı bloger Aleksandr Talipov öz telegram kanalında Ukrayınağa qoltutqan qırımlılarnıñ şahsiy malümatlarını derc ete. Böyle şikâyetlerniñ neticesinde qırımlılar tutula ve Rusiye ordusınıñ «areketini yaramaylaştırğanı» içün memuriy ve cinaiy mesüliyetke çekile.
Rusiye Federatsiyası büyük istilâğa başlağan soñ Rusiye ordusınıñ «diskreditatsiyası» aqqında Memuriy cinayetler kodeksiniñ 20.3.3 maddesi kirsetildi. Rusiye-Ukrayına cenki aqqında malümat tarqatqanlar ve Kremlniñ noqta-i nazarına zıt kelgen er angi fikir bildirgenler taqip etile. Rusiye öz qanunlarını yarımada territoriyasına kenişlete, şunıñ içün qırımlılar da bu madde boyunca mesüliyetke çekilmek telükesi altında buluna.
Ukrayına prezidentiniñ Qırım Muhtar Cumhuriyetindeki daimiy temsilcisi Tamila Taşeva haber etkenine köre, 2023 senesi Rusiye Federatsiyasında ve Ukrayınanıñ işğal etilgen topraqlarında ordunı itibardan tüşürgen er altıncı ceza Qırımda qayd etildi. Açıq davalarnıñ sayısı ise 70,6% arttı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
