İyulniñ 15-ne keçer gecesi Ukrayina Silâlı quvetleri Uçucısız sistemalarınıñ küçleri Qara deñizde 20 Rusiye gemisine ücüm etti, darbe endirilgen nişanlar arasında cermay tankerleri, gaz taşıyıcıları ve buksir bar, dep bildirdi Uçucısız sistemalar küçleriniñ komandanı Robert Brovdi (lağabı "Madâr").
"Azaq deñizinde Rusiye kölge flotunıñ 116 gemisi – deñiz uruşınıñ birinci raundı bitti. Şimdi Qara deñiz", – dep yazdı Brovdi.
Berilgen malümatqa köre, iyulniñ 15-nde gece 20 vastağa ücüm etildi: 17 cermay tankeri, eki gaz taşıyıcı tanker ve bir buksir.
Ukrayina Silâlı quvetleri Uçucısız sistemaları küçleriniñ komandanı tafsilâtlı ve video delilli resmiy esabat soñra aydınlatılacaq, dep bildirdi.
Brovdiniñ aytqanına köre, darbeler cermay, cermay malları ve Rusiye menfaatlarında diger yüklerni taşımaq içün qullanılğan Rusiye deñiz logistikası ve Rusiye "kölge flotunıñ" işini bozmaq içün yapıla.
İyün ve iyül aylarında Qırımdaki arbiy ve energetika obyektleri, Rusiye logistik yolları Ukrayina Silâlı quvetleriniñ eñ büyük ücümlerine oğray. Er kün yañı nişanlarğa darbeler aqqında haber etile, Qırımda yaqarlıq qıtlığı sebebinden adiy insanlarğa benzin satılmay, elektrik energiyası cedvelge köre berile, Keriç köpründe ise nevbetler bar. Bala şifahane müessiseleri ve lagerleri sentâbr ayına qadar raatlanğanlarnı qabul etmey.
Ukrayina Mudafaa naziri Mıhaylo Fedorov darbelerniñ maqsadını añlattı – "Qırım dronlarnen izolâtsiya etile". Onıñ aytqanına köre, bu "rusiyeliler içün pek beklenilmegen aqibetlerge yol aça bile".
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.