Gece Qırımğa 13 uçucısız ücüm etti, dep bildire Rusiye Mudafaa nazirligi.
10-u tüşürildi, daa üç dron «radioelektron küreş vastalarınen bastırıldı». Qırımnıñ Rusiye yolbaşçısı Oleg Krüçkov Qırımnıñ bir qaç rayonında ava mudafaa sisteması çalıştı, dep bildirdi.
Zarar ve yaralanğanlar yoq, dep ayta.
Bu malümatnı mustaqil menbalardan tasdıqlamaq imkânsız ola.
Qırım saifeleri Qırım sakinleri eşitken patlavlarnıñ sebeplerinden biri Kefedeki cermay bazasında yanğın ola, dep yaza.
Avgustnıñ 1-nde Aqyarda patlavlar eşitildi. Şeerniñ Rusiye yolbaşçısı Mihail Razvojayev Qara Qoba rayonında tüşürilgen dron aqqında bildirdi. Memurnıñ aytqanına köre, ot ve çalılar yandı.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Yarımadada yüksek (sarı) terror telükesi bar. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
