İşğal etilgen Qırımnıñ Rusiye akimiyeti yarımadada yolcu trenleriniñ areketini vaqtınca toqtattı. Bu aqta "Grand Servis Ekspress" haber ete.
Qırım yolbaşçısınıñ mesleatçısı Oleg Krüçkov bildirgenine köre, "gece ukrayin uçucısızı Moskva-Aqmescit trenine ücüm etti – teplovoz maşinacısınıñ yardımcısı can berdi, maşinacı yaralandı, yolcular zarar körmedi".
Şu sebepten Keriç, Aqmescit, Kefe ve İçki qasabasında avtobuslar yolcularnı taşıy.
"Grand Servis Ekspress" haber etkenine köre, Qırımdan Rusiyege ketken trenler Keriçten areket etecek.
"Keriçke qadar yolcular avtobuslarnen ketecek. Avtobuslar tola ve trenlerniñ cedveline köre areket ete", – dep aytıla haberde.
Keriçte iyünniñ 7-nde ketken №92 Aqyar – Moskva treni yolcularınıñ bir qısmı endi ketti.
Qırımğa ketken bu trenler toqtatıldı:
- №316 Adler – Aqmescit, iyünniñ 7-nde areket etken, toqtatıldı, 6,5 saat keç qala;
- №025 Mineralnıye Vodı – Aqmescit, iyünniñ 7-nde areket etken, toqtatıldı, 5 saat keç qala;
- №092 Moskva – Aqyar, iyünniñ 6-nda areket etken, toqtatıldı, 5 saat keç qala;
- №173 Moskva – Kezlev, iyünniñ 6-nda areket etken, toqtatıldı, 4 saat keç qala;
- №028 Moskva – Aqmescit, iyünniñ 7-nde areket etken, toqtatıldı, 3 saat keç qala.
Qırımdan ketken bu trenler toqtatıldı:
- №174 Kezlev – Moskva, iyünniñ 7-nde areket etti. 9,5 saat keç qala;
- №92 Aqyar – Moskva, iyünniñ 7-nde areket etti. 10 saat keç qala;
- №98 Aqmescit – Moskva, iyünniñ 8-nde areket etti. 7,5 saat keç qala;
- №184 Aqyar – Murmansk, iyünniñ 8-nde areket etti. 9 saat keç qala.
Rusiye Federatsiyasınıñ Tahqiqat komiteti Moskva – Aqmescit yolcu treniniñ teplovozına qarşı ücümni tahqiq etecek.
"Rusiye Tahqiqat komitetiniñ tahqiqatçıları adisege alâqası olğan Ukrayina Silâlı birleşmeleri iştirakçilerini bilip, areketlerine uquq ceetinden qıymet kesecek", – dep haber ete Rusiye Tahqiqat komitetiniñ matbuat hızmeti.
Ukrayina ve Rusiye arbiyleri uçucısıznıñ tren ücümi malümatını izaatlamadılar.
Hatırlatamız, iyünniñ 2-nde Canköy demiryol stantsiyası mahsus bir ilân yapılğanına qadar yolcularnı mindirip tüşürmesi içün vaqtınca qapatıldı.