Rusiye Federatsiyası kontrolindeki Qırımnıñ emek ve içtimaiy qoruv nazirligi Ukrayinağa qarşı cenkte iştirak etken Rusiye arbiylerine işğal altındaki yarımadada topraq yerine 1 mln ruble berip başladı. Bu aqta Qırımnıñ Rusiye yolbaşçısı Sergey Aksenov bildirdi.
Onıñ aytqanına köre, arbiylerge topraq damartısı ya da para tazminatını saylamağa teklif eteler.
«Bu imkân topraq damartısı daa almağan ve Qırım Cumhuriyeti Mulk ve topraq munasebetleri nazirliginiñ topraqnı bedava berüv emrini almağan SVO (Rusiye akimiyeti Ukrayinağa qarşı cenkni böyle adlandıra – QA) iştirakçi cedvelinde olğan vatandaşlarğa berile», – dep qayd etti Aksenov.
Bundan evel Qırımnıñ Rusiye parlamenti qanun deñişmelerini tasdıqladı, olarğa köre, Qırımdan Rusiyeniñ Ukrafinağa qarşı cenkinde iştirak etkenlerge topraq bedava berilecek. Bu sene mayıs ayında Qırımnıñ Saq ve Qara deñiz rayonlarında Ukrayinağa qarşı cenk iştirakçilerine bermek içün tahminen 1,5 biñ topraq damartısı teşkil etilgenini bildirgen ediler.
Bundan evel Qırımnıñ Rusiye yolbaşçısı Sergey Aksenov bildirdi ki, Ukrayina ile cenk iştirakçileri Qırımda tahminen 730 topraq damartısını aldı. Qırımnıñ mulk ve topraq munasebetleri naziri Larisa Kuliniçniñ aytqanına köre, Saq rayonında Ukrayınağa qarşı cenk iştirakçileri içün 676 topraq damartısı azırlandı.
2023 senesi fevral ayında o vaqıt Ukrayina Prezidentiniñ Qırım Muhtar Cumhuriyetindeki daimiy vekili olğan Tamila Taşeva Ukrayina insan ya da devlet aqlarını bozğan areketlerni tanımaycaq, dep bildirdi. Bularnıñ arasında Qırımda topraq berüv qararları da bar.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
