Qırımtatar resurs merkezi işğal etilgen yarımadada qırımtatarlarnıñ evlerinde, onıñ esaplarına köre, keçirilgen eki tintüv aqqında bildirdi.
Qayd etilgenine köre, birinci tintüv avgustnıñ 7-nde Perekop rayonınıñ Buturnovka (Suvorovo) köyünde keçti. Tintüvni ev saipleri olmağanda keçirgenler. Ekincisi – avgustnıñ 16-nda Or Qapu (Perekop) köyünde oldı. Ondan soñ ev saibiniñ oğlu tutuldı ve saat 09:00-dan 14:00-ke qadar sorğuğa çekildi, soñra yiberildi.
Qırımtatar resurs merkezi böyle areketler sakinlerni qorquzmaq içün yapıla, dep tüşüne. Uquq qoruyıcılar "terroristlerni" qıdıruv manaçığınen cep telefonlarını, bank uyğulamalarını ve Ukrayina kontrolindeki topraqlarnen bağlı yazışmalarnı teşkere. Böyle bağlarnıñ tapılması taqip ve tutuvlarnıñ sebebi ola bile.
Merkez Qırım sakinlerini muqayt olıp, cep telefonlarındaki malümatnı teşkermege ve tintüv, sorğu ve tutuvlar aqqında bildirmege çağıra. Zarar körgenlerniñ isteginen adiseler aydınlatılmasa da, qayd etile bile.