2025 senesi Rusiye işğal etken Qırımda Rusiye ordusı eñ az 70 arbiy talim keçirdi. Bu malümatnı Qırımtatar resurs merkezi (QRM) bere.
QRM evelki haberlerine köre, talimlerniñ büyük qısmı keçken seneniñ ilk yarısında oldı – iyulniñ soñunda 2025 senesiniñ başından 6 ay içinde Rusiye arbiyleri 45 talim keçirdi, dep bildirilgen edi.
QRM 2024 senesine köre talimlerniñ sayısı eksilgenini qayd ete, o yıl eñ az 124 tedbir qayd etilgen edi. Aynı vaqıtta, 2025 raqamları 2023-ten daa yüksek – o yıl 40 talim, 2022 senesi ise 20 talim oldı.
"O qadar büyük arbiy faallik vaqtınca işğal etilgen yarımadanıñ muntazam sürette askeriyleştirilüvi aqqında bildire. Talim manaçığınen patlavlar ola, ağır tehnika areket ete ve arbiylerniñ bulunuvı quvetleşe. Rusiyeniñ işğalci küçleri 2014 senesinden başlap arbiy talimlerni küçlü bir şekilde keçire, arbiy hızmet propagandasını yapa ve Qırım sakinlerini Rusiye Federatsiyası Silâlı quvetlerine çağıra", – dep aytıla haberde.
2022 senesi arman ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı.