Qırımnıñ eki rayonında «BARS-Krım» Rusiye territorial mudafaasınıñ talimleri sebebinden mobil bağ söndürilecek ve yollarda teşkerüvler olacaq. Bu aqta Rusiye kontrolindeki yarımada yolbaşçısı Sergey Aksenov bildirdi.
«Fevralniñ 12-nde Aqşeyh ve Krasnoperekop rayonlarında «Bars-Krım» territorial mudafaası, Rusiye Federatsiyası Mudafaa nazirligi, diger quvet ve uquq qoruyıcı qurulışlarınıñ bölük talimleri keçecek», – dep yardı memur.
Berilgen malümatqa köre, talimlerniñ maqsadı – duşmannıñ diversion gruppalarınıñ yarımadağa kirmesine qarşılıq kösterüvdir.
Qırımtatar resurs merkezi esaplağanına köre, 2024 senesi Rusiye Qırımda eñ az 124 arbiy talim keçirdi. Keçken yıllarğa köre sayısı bayağı arttı: 2023 senesi 40 talim, 2022 senesi – 20, 2021 senesi – 44.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksenov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
