Rusiye işğal etken Qırımda bu yaz soñki bir qaç yılda ilk sefer suv anbarlarınıñ suvı eksilmeyip artmağa devam etken vaziyet ola. Bu yağanaqlar sebebinden degil, Qırımda suv qullanıluvı eksilgeni içün oldı. Bu aqta Qırım.Aqiqatqa adını gizlegen Aqmescitli iqtisadiyatçı ayttı.
Onıñ malümatına köre, az suv qullanıluvı region içün bir qaç negativ sebepnen bağlı.
"Bu yaz suv qullanıluvı pek eksilgenini köremiz. Bir qaç sebep bar ve episi yahşı yaşayıştan degil. Esas olğanlarnı aytayım – Qırım yarımadasında elektrik energiyası söndürilgeni içün suv berilmey, imalât pek azala, köy hocalığında suvarıluvdan vazgeçeler, kurort mevsimi yoq… Böyle vaziyette suv anbarlarından suvğa ihtiyac yoq, şunıñ içün iyul ayında bile tola. Bu yıl bu asırda Qırım iqtisadiyatınıñ misalsiz yıqıluv yılı ola. Aqibetleri ise qırımlılarnıñ bütün yaşayış saalarında aks ola", – dep tarif etti ekspert.
Yarım ayıl içinde Qırım suv anbarlarınıñ toluv seviyesi 100 mln kubqa qadar arttı, keçken sene ise tek 14 mln kub olğan edi. Bu malümatnı "Sputnik v Krımu" radiosınıñ yayınında Vernadskiy adına Qırım Federal universitetiniñ "Biohimik tehnologiyalar, ekologiya ve farmatsiya institutınıñ" suv qullanuv himik tehnologiyalar kafedrasınıñ müdiri, tehnik ilimler doktorı, professor İlya Nikolenko ayttı.
Elektrikanıñ söndürilüvi ve yaqarlıq qıtlığı Qırım iqtisadiyatında kollapsqa yol aça. Müessiseler işini qısqarta ve toqtata. Turistik biznes kurort mevsimi olmağanı içün milliardlıq zarar köre. Zahire bereketi pek zayıflaycaq ve yüzüm toplanması daa zor olacaq, dep beklenile.