Qırımda Canköy rayonınıñ sakinleri içtimaiy ağlarda şikâyet etkenlerine köre, Rusiye akimiyetinde elektrika ve suv söndürilgen soñ tazminat almağa istegen er adamlardan Rusiye arbiy komissarlığından arbiy cedvelge alınğanlarına dair pasportlarında işaret olğanını köstermelerini talap eteler. Bu aqta yarımadanıñ Rusiye yolbaşçısı Sergey Aksenovnıñ yazısı altında ve yerli toplulıqlarda yazalar. "Novaya Gazeta-Yevropa" bu mevzuda onğa yaqın haberni qayd etti.
Laf energetika infrastrukturasına qarşı ücümlerden soñ 48 saattan ziyade elektrikasız ve suvsız qalğan sakinler içün bir kerelik 15 biñ ruble para aqqında kete.
Canköy rayonınıñ sakinlerinden biri yazğanına köre, erkeklerden ariza bergende pasportta arbiy komissarlıqta müür qoymalarını talap eteler. Şartlarğa köre, belli adreste yaşağanlarını tasdıqlamaq kerek – bunıñ içün qayd oluv vesiqaları, iş, oquv yeri ya da tibbiy müessise vesiqaları yeterli olur.
Qadın Aksenovdan bu talap qanunğa uyamı ve bütün Qırımda keçerlimi dep soradı. Yarımada yolbaşçısı oña cevap bermedi.
"Krım Operativnıy" pabliki Qalay köy memuriyetiniñ aytqanlarına esaslanıp, bu talap tek tibbiyet saasında mütehassıs olğan erkek ve qadınlarda keçe, dep yaza.
Tibbiy hadimler (em erkekler, em qadınlar) Rusiyede arbiy sayıla ve arbiy cedvelinde olmalı. Olarnı askerlikke çağıra bile, yedekke seferber ete bile ya da añlaşmağa köre celp ete bileler.
Qırım akimiyeti tazminat almaq içün arbiy komissarlıqtan işaret almaq kerek, dep resmiy şekilde bildirmegen edi.
İyün ve iyül aylarında Qırımdaki arbiy ve energetika obyektleri, Rusiye logistik yolları Ukrayina Silâlı quvetleriniñ eñ büyük ücümlerine oğray. Er kün yañı nişanlarğa darbeler aqqında haber etile, Qırımda yaqarlıq qıtlığı sebebinden adiy insanlarğa benzin satılmay, elektrik energiyası cedvelge köre berile, Keriç köpründe ise nevbetler bar. Bala şifahane müessiseleri ve lagerleri sentâbr ayına qadar raatlanğanlarnı qabul etmey.
İyulniñ başından Ukrayina Uçucısız sistemalar quvetleri er kün Azaq ve Qara deñizlerinde Qırımğa yaqarlıq da taşığan Rusiye "kölge flotunıñ" tankerleri ve diger gemilerine darbe endirgenine dair esabat bere.
Ukrayina Mudafaa naziri Mıhaylo Fedorov darbelerniñ maqsadını añlattı – "Qırım dronlarnen izolâtsiya etile". Onıñ aytqanına köre, bu "rusiyeliler içün pek beklenilmegen aqibetlerge yol aça bile".
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.