Rusiye kontrolindeki Qırımnıñ fevqulâde vaziyetler naziri Sergey Sadakliyev Qırımda sığınaqlarnı teşkermek kerek, dep bildirdi. Bu aqta onıñ Telegram kanalı haber ete.
«Şimdi pek qıyın vaqıt. Reberlerge sığınaqlarnıñ azırlığını, imaye inşaatlarını teşkermege emir etildi. İdare şirketlerniñ reberleri eali içün sığınaq yerlerini belgilemek kerek, anda yaşayış içün kerekli şaraitler bar olğanından emin olmaq kerek», – dep aytıla haberde.
Avgustnıñ soñunda Aqyarda Rusiye işğal etken yerlerde patlavlardan soñ Qırım yarımadasında sığınaqlar teşkerilip başlandı. Aqyarnıñ Rusiye yolbaşçısı Mihail Razvojayev şeerde mağaz ve sığınaqlarnıñ 82%-ı temizlendi, dep esabat berdi.
Oktâbr ayında Aqyarda eski evlerde sığınaqlar aqqında malümat peyda oldı. Yerli sakinlerniñ malümatına köre, mağazlar insanlarnı qabul etmek içün azır degil. Razvojayev sığınaq levhalarını yerleştirüv şirketleriniñ işini tenqit etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
