Qırımdaki şifahanelerni Rusiye arbiyleriniñ tedaviylevi ve reabilitatsiyası içün qullanalar, dep bildirdi Ukrayına prezidentiniñ Qırım Muhtar Cumhuriyetindeki daimiy vekiliniñ muavini Denis Çistikov Svoboda Live yayınında.
«Şimdi şifahanelerni arbiyler, olarnıñ reabilitatsiyası ve tedaviylevi içün qullanalar. Şunıñ içün bu em körgezme, em maliye içün qullanıla bile. Bu şifahanelerni qapatmamaq içün şimdi federal bücetten çoq para ayırıla, hadimlerni tutmaq ve qapatmamaq içün. Vaqtınca işğal etilgen Qırımda stabillik resimlerini köstermek içün», – dep bildirdi Çistikov.
Onıñ bildirgenine köre, Rusiye akimiyeti ortaqları olğan Beyazrusiye, Qazahistan, Tacikistan arasında turizmni faal sürette köstere. «Çetel turistlerini celp etmege tırışalar, olarnıñ da raatlanmağa niyetleri yoq. Amma bücet hadimleri sayesinde bu raatlıq olacaq, kösterecekler», – dep qoştı o.
Berilgen malümatqa köre, Qırımnıñ Rusiye ükümeti kurort ve turizm nazirligi Qırım turistik biznesiniñ menfaatlarını qoruycaq cemaat teşkilâtınıñ quruluvına teşebbüs kösterdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
