Ukrayina prezidenti Volodımır Zelenskıy Kyivde qırımtatar halqı genotsidiniñ qurbanları hatırasına memorial açılışında çıqışta bulundı.
Siyasetçi «Qırım serbest olacaq», dep eminliknen ayttı. Onıñ aytqanına köre, bu «bir vazifemiz, ve bütün dünya bugün Ukrayinanen beraber bu küreşte buluna».
«Bugün dünyanı şunı qayd etmek içün turamız: Qırım – Ukrayina, Qırım – bizim evimiz. Yat adamlar evimizden ketkenine qadar ögge ketecekmiz», – dedi Zelenskıy.
Ukrayina prezidenti qayd etkenine köre, kün kelir, böyle abide işğalden azat etilgen Qırımda da olacaq.
«Qırım – tek topraq degil. Canımıznıñ bir parçası, insanlarımız medeniyeti, tili, ananelerinen barışıq ve garmoniya içinde yaşağan bir topraq. Tek Qırımnı qaytarmaq içün küreşmeymiz – biz adaletni ğayrıdan tiklemek, er bir qırımlını evine, Rusiye ve qorqudan azat etilgen Qırımğa qaytarmaq içün küreşemiz… Eminmiz, Qırım serbest olacaq», – dep aytıla Zelenskıynıñ sözlerinde.
Memorial qırımtatar halqınıñ tarihında üç facialı adiseni hatırlata: 1783 senesi Qırım Rusiye imperiyası tarafından ilhaq etilgen edi, 1944 senesi sürgünlik ve 2014, 2015 seneleri işğal, dep ayttı Ukrayina prezidenti.
Tedbirde Ukrayina prezidentiniñ ömür arqadaşı Olena Zelenska, Hırvatistan ve Latviya baş nazirleri Andrey Plenkoviç ve Evika Silinâ ve Litvaniya prezidenti Gitanas Nauseda iştirak etkenler.
Kyivde milliy memorial «Lıbidska» metro stantsiyası yanındaki eski Çekistler skveri yerinde açıldı.
1944 senesi mayısnıñ 18-nde Sovet rejimi Qırımdan Orta Asiyağa bütün qırımtatar halqını sürgün etti. Üç kün içinde 200 biñ qırımtatar mal vagonlarında Vatanından alıp çıqarıldı.
Er yıl Qırımda qırımtatar halqı sürgünliginiñ qurbanlarını añma tedbirleri, hususan Qırım paytahtıla matem mitingi keçirile edi. Amma Rusiye Qırım yarımadasını işğal etken soñ Aqmescitniñ merkezinde böyle aktsiyalarnıñ keçirilüvi yasaqlandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
