«Sarı şerit» areketiniñ faalleri gece Aqmescit ve Aqyarda Ukrayinağa qoltutuv aktsiyasını keçirip, bu şeerlerde ukrayin tirenüviniñ timsallerini tarqattı, dep haber ete areketniñ Telegram kanalı.
«Ukrayin Qırımınıñ eki büyük şeeri Aqmescit ve Aqyar bu gece sarı-mavı renklernen toldı. İşğalciler yuqlay, tirenüv areketi – yoq. Bu gece «Sarı şeritniñ» faalleri daa bir aktsiya keçirdi. Yapıştıruv kâğıtları ve şeritler – Aqyarnıñ Nahimov ve Balıqlava rayonlarında, Aqmescitniñ Jeleznodorojnıy ve Kiyevskiy rayonlarında», – dep aytıla haberde.
«Sarı şerit» teşkilâtı – Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areketniñ teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyeti eñ faaldir, hususan Aqmescit, Yalta, Kezlev ve Kefede, soñki vaqıtları ise olarğa Simeiz, Balıqlava kibi kiçik şeerlerniñ sakinleri qoşula.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
