Norvegiya, Makedoniya, Arnavutlıq, Ukraina ve Gürcistan Qırım işğali sebebinden Avropa Birliginiñ Rusiyege qarşı kirsetken sanktsiyalarını uzatmaq qararına qoşuldı. Avropa Birligi adından Yüksek vekilniñ Qırım ve Aqyarnıñ qanunsız ilhaqına cevap olaraq sıñırlav tedbirlerine dair beyanat iyülniñ 27-nde derc etildi.
Beyanatta 2021 senesi iyünniñ 21-nde Şura Qırım işğali ve Donbastaki cenk areketleri sebebinden Rusiyege qarşı kirsetilgen iqtisadiy sanktsiyalarnı uzatmaq qararını qabul etti, dep aytıla.
Bu qararğa daa bir qaç memleket qoşuldı, dep aytıla beyanatta.
«Namzet memleketler Makedoniya ve Arnavutlıq, Avropa serbest ticaret birliginiñ azası Norvegiya, Avropa iqtisadiy alanınıñ azası, Ukraina ve Gürcistan Şuranıñ bu Qararına qoşulalar. Olar milliy siyasetlerini bu Qararğa uyğun yapacaqlar», – dep aytıla haberde.
Beyanatta qayd etilgenine köre, Avropa Birligi bu «vazifeni köz ögüne ala ve onı alğışlay».
Kreml bu beyanatnı şimdilik izaatlamadı.
Faqat Rusiye Tış işler naziri Sergey Lavrov Qırım işğalinden soñ onıñ memleketi, Rusiye siyasetçileri ve şirketlerine qarşı sanktsiyalarnı kirsetüv tedbirlerini «yapışıcı» dep adlandırğan ve ABDni qabaatlağan edi.
Lavrov Rusiye ve Avropa Birligi arasındaki munasebetler Ukraina ve Qırımdaki adise-vaqialar sebebinden bozuldı, dep tanıdı.
2020 senesi noyabr ayında Rusiye Tış işler naziri Ğarp Qırım işğali sebebinden sanktsiyalar kirsetip, «açuvını çıqara», dep bildirdi.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
