Rusiye kontrolindeki Qırım Yuqarı mahkemesi Rusiye uquq qoruyıcıları Ukrayina telükesizlik hızmetinen işbirliginde qabaatlağan erkekke qarşı cinaiy davanı yolladı. Bu aqta Qırımnıñ Rusiye prokuraturasınıñ matbuat hızmeti haber ete.
Berilgen malümatqa köre, er adam "mahsus arbiy operatsiya keçirilüvine qarşı çıqıp" (Rusiyede Ukrayinağa qarşı cenkni böyle adlandıra – QA), 2023 senesi Ukrayina Telükesizlik hızmeti vekillerinen bağ qurdı. 2024 senesi iyul ayında o, Rusiye gvardiyasınıñ arbiy tehnikası ve arbiyleri bulunğan yerniñ fotoresimlerini yapqan eken. Rusiye Federatsiyası uquq qoruyıcılarınıñ malümatını cenk vaziyetinde teşkermek imkânsız ola.
Er adamnıñ adı ve soyadı aytılmay, onıñ açıq izaatları yoq. Qabaatı isbatlansa, "devlet hainligi" maddesine istinaden ömür boyu apis cezasına qadar azatlıqtan marum etile bile (Rusiye Federatsiyası Ceza kodeksiniñ 275-inci maddesi).
Ukrayina telükesizlik hızmeti bu malümatnı izaatlamadı.
FSB böyle davalarnı aman-aman er kün aça, 2014 senesine qadar ise olarnıñ sayısı yılda eñ çoq 10 edi.