Ukrayina Mudafaa nazirligi Baş istihbarat idaresiniñ malümatına köre, vaqtınca işğal etilgen Ukrayina topraqlarındaki demografik vaziyet pek fenalaşa. Ukrayina Mudafaa nazirligi Baş istihbarat idaresiniñ talilci malümatında aytılğanına köre, Rusiye akimiyeti ukrayin kimligini yoq etmek içün etnotsid siyasetini keçirmeyege devam ete ve yerli ealini Rusiyeden ve Orta Asiyadan kelgenlernen deñiştirmege tırışa.
Kreml işğal etilgen topraqlarğa vatandaşlarını ketirip yerleştire. 2026 senesi iyul ayına qadar işğal etilgen Qırımda ve Aqyarda 200-300 biñ rus buluna. Qayd etilgenine köre, 2042 senesine qadar tek Aqyarğa daa 130 biñ yerleştirmege planlaştırıla.
Ketirilgenlerniñ ekseriyeti – işğalci memuriyet, küç qurulışları, bücet müessiseleriniñ hadimleridir. Rusiye işğal etilgen topraqlarğa oca, qurucı, arbiy pensionerlerni yollay.
İşğalciler insanlarnı celp etmek içün ciddiy maddiy bonuslar teklif ete: eki qat aylıq, künde 7210 ruble olaraq kiralıq tazminat, bir kün içün 8480 ruble. Neticede bir ayda "memur" 470 biñ rubleden ziyade ala bile (5 biñ dollardan çoq) – Rusiyede ortaq aylıqnıñ 8 qatı.
Qoşma imtiyaz olaraq – alığan ukrayin ev ve topraq damartılarınıñ berilüvi. 2025 senesi tek Qırımda arbiy rusiyelilerge 4 biñ topraq damartısı berildi. Mında Rusiye gençlerni ve tecribeli mütehassıslarnı yerleştirüv programmalarını keçire.
Donetsk, Lugansk, Zaporijjâ ve Herson vilâyetleriniñ işğal etilgen topraqlarında 2024 senesi tahminen 200 biñ rusiyeli ve 100 biñ Orta Asiyalı ve Kavkazlı bar edi. 2026 senesiniñ başından işğal etilgen Donetsk vilâyetine tahminen 10 biñ "emek migrantı" keldi.
Ukrayina Mudafaa nazirligi Baş istihbarat idaresi Rusiyeniñ siyaseti vaqtınca işğal etilgen topraqlarda felâket aqibetlerge yol açtı, dep qayd ete. Doğuv seviyesi pek alçaq seviyeyede, ölüm seviyesi ise pek yüksek, orta Rusiye raqamlarından bile qat-qat büyük.
2025 senesi Donetsk vilâyetiniñ işğal etilgen qısmında eali 9,9% arttı – bu Rusiyeden 2,4 qat beter. Cenkniñ on yılı devamında Donbas ealisi üçte bir olaraq eksildi: 2001 senesi 7,37 mln insandan 2024 senesiniñ başına qadar 3,75 mln insanğa qadar.
Ukrayinalılar işğalden kete, çünki cenk areketleri devam ete, tibbiyet ve içtimaiy hızmet keyfiyeti pek yaramay, repressiyalar, ruslaştıruv, Rusiye ordusına seferberlik yapıla ve mulk aqqı qorçalanmay.
Baş istihbarat idaresiniñ bildirgenine köre, bu müstemleke ve ruslaştıruv siyasetiniñ arbiy cinayet alâmetleri bar – öz vatandaş ealisiniñ işğal etilgen topraqqa qanunsız avuştırıluvı (Halqara cinaiy mahkemesiniñ Roma statusı).