Qırımda Rusiye akimiyeti Rusiye Federatsiyası Memuriy uquq bozuvları kodeksiniñ "Rusiye Federatsiyası Silâlı quvetleriniñ itibarını tüşürüv" 20.3.3 maddesine istinaden 1774 dava açtı. Bu aqta Ukrayina prezidentiniñ Qırım Muhtar Cumhuriyetindeki daimiy temsilciliginiñ matbuat hızmeti bildirdi.
"1651 adisede para cezası berildi ya da dava başqa maddege istinaden umumiy qarar qabul etilgen diger davağa qoşuldı. 8 adisede dava baqılmağa devam ete. Qararlarnıñ 53%-ı (870) qadınlar, 47% (779) erkeklernen bağlı", – dep aytıla haberde.
Rusiye akimiyeti bu raqamlarnı izaatlamay.
Ukrayina prezidentiniñ Qırım Muhtar Cumhuriyetindeki daimiy temsilciligi bildirgenine köre, Roskomnadzor Rusiye işğal etken Ukrayina topraqlarında, hususan Qırımda haberler kontrolini quvetleştire.
Rusiye müessisesi internet provayderleriniñ internet ağına qoşulğan bütün cihazlarnıñ IP-adresleri, geolokatsiya malümatı, ağğa kiriş içün qullanılğan bütün cihazlarnıñ identifikatorları, qullanılğan programma teminlevi ve internet-trafik aqqında malümatnı toplap, Roskomnadzorğa bermesini közde tuta.
Rusiyede ve onıñ tarafından işğal etilgen topraqlarda quvetçiler Ukrayina tarafdarlarını taqip eteler. Rusiye tarafdarı olğan Qırımlı bloger Aleksandr Talipov öz telegram kanalında Ukrayinağa qoltutqan Qırımlılarnıñ şahsiy malümatlarını derc ete. Böyle şikâyetlerniñ neticesinde Qırımlılar RF ordusını "itibardan tüşürüv" içün yaqalana ve memuriy ve cinaiy mesüliyetke çekile.