Ukrayınanıñ er angi toprağınen bağlı uzlaşuvlar Rusiyenen bir vaqıt muzakere etilmeycek, dep bildirdi Qırım.Aqiqatqa Ukrayına prezidenti ofisiniñ yolbaşçı muavini İğor Jovkva.
«Ukrayına toprağını satmaycaq. Hatırlañız: cenk başında Ukrayınanı uzlaşuvğa boysundırmağa tırışqan ediler. Şimdi de tarifler bar: vaqtınca toqtayıq, ateş toqtatılsın, şimdi olğan yerde toqtayıq. Soñra muzakere de keçirirmiz. Bunı Rusiye, onıñ hızmetçileri ve aracıları ayta, olar mında bir muvafaqiyet qazanmağa tırışalar. Cevap tam – aracılar Ukrayınağa kerekmey. Ukrayına tarafında olğan lider, memleketler kerek. Çünki Ukrayına toprağıyeı satmaycaq, Ukrayına olarnı azat etecek», – dep bildirdi Jovkva.
Onıñ qayd etkenine köre, şimdi Qırım Kyivniñ kontroli altına nasıl qaytarılacağını kimse aytamay, amma «bu mıtlaqa olacaq». Onıñ aytqanına köre, «diplomatik yolğa arbiy vastalar qoşula bile».
ABD devlet kâtibiniñ muavini Viktoriya Nuladn Amerika Birleşken Devletleri Ukrayınanıñ işğal etilgen Qırımdaki Rusiye arbiy obyektlerine darbe endirmesine qoltuta, dep bildirdi. Buña cevap olaraq Peskov Nulandnıñ Qırım darbeleri lafları «Washingtonnıñ halqara kerginlikniñ baş provokator rolüni qayd ete», dep bildirdi.
Bıltır dekabr ayınıñ soñunda Ukrayına arbiy istihbarat yolbaşçısı Kırılo Budanov Ukrayına Qırımnı em küç, em diplomatiyanen keri alacaq, dep bildirdi.
Ukrayına Silâlı quvetleriniñ baş komandanı Valeriy Zalujnıy Qırımnı işğalden azat etüv imkânlarına qıymet kesip, birinciden Zaporijjâ vilâyetiniñ Melitopol şeerini kontrol altına almaq kerek, dep bildirdi.
Avropada ABD ordusınıñ sabıq komandanı Ben Hoces Ukrayına Qırımnı 2023 senesi yaznıñ soñuna qadar azat etecek, dep bildirgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
