Mayısnıñ 28-nde kündüz Rusiye Federatsiyası Fevqulâde vaziyetler hızmetiniñ Qırım idaresi yarımadada raketa telükesi aqqında bildirdi, Rusiye akimiyeti kontrolindeki Keriç köpründeki vaziyetke dair Telegram kanalı keçitniñ işi toqtatıldı, dep haber etti.
Aynı vaqıtta, Aqyarnıñ Rusiye yolbaşçısı Mihail Razvojayev künniñ üçünci ava telükesi aqqında bildirdi, o, 16:24-ke qadar devam etti. Bundan evel telüke saat 13:37-den 14:15-ke qadar ve 2:52-den 3:38-ge qadar ilân etildi.
Rusiye monitoring telegram kanalları Storm Shadow raketaları qullanıla bile, dep tenbiley. Bu malümatnı başqa menbalarda teşkermek zor. Rusiye arbiyleri vaziyetni resmiy şekilde izaatlamay.
Yañı malümat: saat 16:25-te Rusiye Federatsiyası Fevqulâde vaziyetler hızmetiniñ Qırım idaresi raketa telükesi lâğu etildi, dep haber etti.
Mayısnıñ 28-nde gece ve saba Qırımda ve Aqyarda patlav ve atışlar eşitildi, yarı geceden soñ uçucısız telükesi ilân etildi. Aqyarda saat 02:57-de patlav oldı, onı şeerniñ Şimaliy tarafında ve Bağçasaray rayonında eşitkenler. Saat 05:15-te "Kaça" uçaq alanı rayonında eki küçlü patlav oldı ve Aqyar tarafına uçqan qırıcı köründi.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete, çoqusı allarda Rusiye Mudafaa nazirligi ya da Rusiye akimiyeti arbiy obyektlerge ücüm etkenini tasdıqlamay.