Aqmescitteki mahkeme noyabrniñ 23-nde tutulğan 10 qırımtatarını Kezlevdeki vaqtınca tutuv izolâtorına yolladı.
«Qırım birdemligi» cemaat birleşmesi haber etkenine köre, Kezlevge Alim Aliyev, Absettar Settarov, Enver Alimov, Murtaza Fahriyev, Zekirya Demirci, Server Çolakçik, Mustafa Seydaliyev, Alim Suleymanov, Reşat Paralamov, Dlâver İbraimov yollanıldı.
Episi Rusiye Federatsiyasınıñ Memuriy uquq bozuvları kodeksiniñ 20.2.2 maddesine istinaden («Cemaat nizamınıñ bozuluvına sebep olğan vatandaşlarnıñ cemaat yerlerinde aynı vaqıtta kütleviy şekilde bulunması ve (ya da) areket etmesi») qabaatlandı. Mahkemeden evelki gece olar vaqtınca tutuv izolâtorlarında ya da Aqmescitniñ polis bölüklerinde tutuldı, dep bildirdi «Qırım birdemligi».
Aqmescitte noyabrniñ 23-nde aqşam Rusiye quvetçileri azatlıqqa çıqqan Edem Semedlâyevni qarşılamaq içün vaqtınca tutuv izolâtorınıñ binasına kelgen faallerni tuttı. 31 insan tutuldı, aralarında 10 qadın, jurnalistler ve matbuat kartları olğan «Qırım birdemliginiñ» mühbirleri bar. Tutulğanlar üç polis bölügine alıp ketirildi.
Aqmescitniñ vaqtınca tutuv izolâtorınıñ binası ögünde tutulğan 15-ten çoq qırımtatar faali Rusiye kodeksiniñ memuriy maddesine istinaden apiske alındı.
Qırım Muhtar Cumhuriyeti ve Aqyar prokuraturası qırımtatar faalleriniñ tutuluvı sebebinden cinaiy tahqiqat başlattı.
Ukraina akimiyeti, aq qorçalayıcılar, çetel elçihaneleri ve missiyaları Rusiyeni Qırımda böyle taqiplerni toqtatmasına çağıra. Rusiye akimiyeti böyle çağıruvlarnı körmemezlikke ura.
