Noyabrniñ 29-ı geceden berli Qırımda yaramay ava oldı, gece yarımadada qar yağdı. Afet qazalarnıñ sebebi oldı, neticede şeer ve rayonlar elektriksiz qaldı.
Qırım.Aqiqat mühbiri bildirgenine köre, Aqmescitte qar eki saattan az yağdı. Bazı yerlerde qao üç santimetrden çoq oldı. Maşinalar keçken yerlerde sılaq qar aman-aman birden iridi.
Sabağa doğru gece qarı maşinalarda, ev damlarında, otta qaldı. Şeerliler birinci dekabr qarı manzarasında fotoresim çıqaralar.
Mühbirniñ qayd etkenine köre, dekabrniñ 1-nde saba yağmur islep başladı.
«Meteorologlar tahmin etkeni kibi, ilk qar yağdı. Gece 7 kombinatsiyalanğan yol maşinası çıqtı. Temizlik yapıldı ve qaza ceetinden telükeli yerlerniñ klegey buz ile küreş işlev yapıldı. Naqliyatnıñ telükesiz keçmesi temin etildi. Saba erteden azbar hızmetçileri çalışıp başladı», – dep yazdı dekabrniñ 1-nde saba Aqmescitniñ Rusiye memuriyetiniñ yolbaşçısı Valentin Demidov.
Qırımdaki Rusiye Fevqulâde vaziyetler nazirliginiñ idaresi bildirgenine köre, eñ çoq yağanaq Ay-Petride yağdı, mında eñ küçlü yel esti.
«Qarışıq yağanaqlar Cumhuriyette qayd etildi. Ay-Petride – 54 mm, Keriç – 34 mm, Aqmescit – 31 mm. Eñ küçlü ruzgâr Ay-Petride qayd etildi – saniyede 41 metr», – dep bildirdi Qırımdaki Fevqulâde vaziyetler naziri Arkadiy Ojogin «Krım24» telekanalına.
Onıñ malümatına köre, keçken gece tereklerniñ tüşmesinen bağlı 21 qaza qayd etildi. 10-u maşinalarğa tüşken tereknen bağlı.
Yalta Rusiye memuriyetiniñ yolbaşçısı Yanina Pavlenko bildirgenine köre, yaramay ava sebebinden elektrik teminlevinde aqsavlar oldı, gaz hatları ve trolleybus telleri zarar kördi.
«Tahmin etilgeni kibi, afet bizge de tesir etti. Tahminen saat 21.00-larda bazı yerlerde elektrik energiyası kesildi, gaz teminlev sisteması zarar kördi, bazı yerlerde trolleybus hatları zarar kördi, üç yerde balaban terekler er kes qullanğan yollarğa tüşti», – dep yazdı o, içtimaiy ağlarda.
Keriçte de yaramay ava oldı. Yerli kütleviy haber vastalarınıñ malümatına köre, şeerde gece bir sıra rayon elektrik teminlevinde olğan aqsavlar sebebinden qaranlıqta qaldı.
Tüşken terekler şeerde keçişni vaqtınca blok etti.
Telegram kanallarında Keriçte taş divarı gaz borusına tüşti, dep bildireler.
Noyabrniñ 29-nda Qırımda küçlü yel sebebinden tahminen 56 biñ insan elektriksiz qaldı. Qurtarıcılarnıñ malümatına köre, küçlü yel sebebinden Aqmescit, Aqmescit, Bağçasaray ve Saq rayonlarında elektrikler kesilgen edi. Qırım.Aqiqat mühbiri bildirgenine köre, Aqmescitte küçlü yel tereklerni yıqtı, elektrik tellerini üzdi.
Noyabrniñ 30-nda Qırım Fevqulâde vaziyetler nazirligi 4-ü hastahanege alınğan 5 yaralanğan kişi aqqında bildirdi. Dekabrniñ 1-nde Qırımda furtuna ihtarı devam ete.