Qırımda soñki yıl devamında Rusiye uquq qoruyıcıları yarımadanıñ Rusiye işğaline qarşı aktsiyalarda iştirak etken qadınlarnıñ taqip etilüvini quvetleştirdi. Bu aqta mayısnıñ 6-nda Qırım aq qorçalayıcı gruppasınıñ (QAQG) idare reisi Olga Skripnik «Vatandaş cemiyeti Rusiye esirliginde» adlı tedbirde ayttı.
«FSB olarğa qarşı cinaiy davalar uydurıp çıqara, zorbalıq qullana ve maneviy basqı yapa, olarğa kerekli tibbiy yardım kösterilmey. Qadınlarğa qarşı basqınıñ ayrı bir usulı – balalarını alıp, Rusiyedeki balalar evlerine alıp ketmeknen qorquzmaqtır», – dep aytıla QAQG haberinde.
Olga Skripnik Aqyarlı 69 yaşında faal Galina Dovgopola ve mayısnıñ 6-nda doğğan kününi qayd etken vatandaş jurnalisti ve emşire İrina Daniloviç aqqında ayttı.
Skripnik qayd etti ki, keçken yılnıñ tek küzünde Aqyarda üç qadın tutuldı – 2014 senesi Ukrayina tarafdarı narazılıq aktsiyalarınıñ iştirakçileri. Olardan birisi 58 yaşında tilşınas Oksana Senecuk, digeri ise 35 yaşında faal, o, 2020 senesi mart ayında 10 yılğa mahküm etildi.
«Büyük istilâ başlağanından berli Herson ve Zaporijjâ vilâyetlerinden hırsızlanğan qadınlar da Qırımda tutuldı. Qırımda faallerni taqip etüv tecribesi 2022 senesinden soñ işğal etilgen topraqlarğa faal sürette tarqala. Misal olaraq, İrina Gorobtsova, IT şirketleriniñ testeri ve cemaat faali. Hersonnıñ Rusiye işğali vaqtında yerli hastahanege yardım etken, gumanitar yardım köstergen edi. 2022 senesi mayıs ayında onı hırsızlap, Aqmescitke alıp ketkenler. 2024 senesi avgust ayında onı «casuslıqta» qabaatlap (Rusiye Federatsiyası Ceza kodeksiniñ 276-ncı maddesi), 10 yıl ve 6 ay koloniyada qalmasına üküm ettiler», – dep tarif etti Skripnik.
Skripnik haber etkenine köre, 2022 senesine qadar apiske alınğan faaller cedvelinde tek 3-5 qadın bar edi. Al-azırda Qırım ve Rusiyedeki apishanelerde tutulğan eñ az 20 ukrayinalı qadın qayd etile.
«Rusiyenen olğan er angi muzakerede apiske alınğan bütün vatandaşlar aqqında tolu malümat bermek talabı ve adiy vatandaşlarnı, şu cümleden qadınlarnı azat etmek talabı olmaq kerek. Rusiye esirligindeki qadınlar halqara seviyede körünmey qala», – dedi Olga Skripnik.
Rusiyede ve onıñ tarafından işğal etilgen topraqlarda quvetçiler Ukrayina tarafdarlarını taqip eteler. Rusiye tarafdarı qırımlı bloger Aleksandr Talipov öz telegram kanalında Ukrayinağa qoltutqan qırımlılarnıñ şahsiy malümatlarını derc ete. Böyle şikâyetlerniñ neticesinde qırımlılar RF ordusını «areketsizleştirgenleri» içün yaqalana ve memuriy ve cinaiy mesüliyetke çekile.
Ukrayina prezidentiniñ Qırım Muhtar Cumhuriyetindeki temsilciligi Roskomnadzor Rusiye işğal etken Ukrayina topraqlarında, hususan Qırımda informatsion ceetten kontrolni quvetleştire, dep bildirdi.
Haberge köre, Rusiye müessisesiniñ qararına köre, internet provayderleri internetke bağlanğan bütün cihazlarnıñ IP adresleri, geolokatsion malümat, ağğa irişüv içün qullanılğan bütün cihazlarnıñ identifikatorları, qullanılğan programma teminatı ve internet trafiki aqqında malümatnı toplap Roskomnadzorğa bermeli.
«KrımSOS» aq qorçalayıcı teşkilâtınıñ malümatına köre, 2024 senesi eñ az 56 qırımlı Rusiye akimiyeti tarafından taqip etildi. Cinaiy davalarnıñ sebebi Rusiyede yasaqlanğan teşkilâtlarnen bağlar, devlet hainligi, casuslıq, açıq fikir bildirüvleri, diversiyalar ya da zorbalıq çağıruvlarında qabaatlavlar olğan.
Aq qorçalayıcılar Rusiye uquq qoruyıcıları açqan devlet hainligi, işbirligi ve casuslıq davaları bir qaç qat artacaqtır, dep tahmin ete. Şimdi FSB aman-aman er kün böyle davalar aça, 2014 senesine qadar olarnıñ sayısı yılda eñ çoq 10 edi. Ukrayinağa qarşı büyük istilâdan soñ devlet hainligi maddesi Rusiyede cenkke qarşı çıqqanlarğa qarşı qullanılğan maddelerden eñ populârı oldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
