İşğal etilgen Qırımnıñ Rusiye qadısı devlet hainliginde qabaatlanıp, 12 yıl koloniyada qalmasına ğıyabiy şekilde üküm etildi. O, Qırımda Qırımtatar Milliy Meclisiniñ reis muavini Ahtem Çiygoznı taqip etti.
İşğalden soñ Ukrayınağa bergen ant sözlerinden vazgeçken Ukrayına qadısı devlet hainliginde (Ukrayına Ceza kodeksiniñ 111-inci maddesiniñ 1-inci qısmı) qabaatlandı.
«Qadı» 2014 senesi fevralniñ 26-nda Qırım Yuqarı Şurası ögünde Ukrayına topraq bütünligine qoltutqan miting iştirakçilerini qanunsız bir şekilde taqip etüvnen bağlı. 2016 senesi o, Rusiye Federatsiyasınıñ qanunlarına esaslanıp, Qırımtatar Milliy Meclisiniñ reis muavini Ahtem Çiygoznı nezaret altında tutuv müddetini uzatmağa qarar bergen edi. Daa soñra yarımadanıñ mahkeme repressiv maşinası Çiygoznı yapmağan cinayette ve Qırım işğalinden evel olğan adise-vaqialarda qabaatlı tanıp, onı 8 yılğa azatlıqtan marum etti», – dep aytıla Ukrayına prokuraturasınıñ haberinde.
Qabaatlanğannıñ adı ve soyadı aytılmay. Medianen laf etmesi vekâletinden tış olğan ve gizli qalmağa istegen memur Qırım.Aqiqatqa ğıyabiy üküm Olga Gurinağa çıqarıldı, dep bildirdi. Açıq menbalarda olğan malümatqa köre, 2014 senesi Qırım işğalinden soñ Gürina Rusiye kontrolindeki Aqmescitniñ Kiyev rayon mahkemesiniñ qadısı vazifesine tayin etildi. O, Qırımda Qırımtatar Milliy Meclisiniñ reis muavini Ahtem Çiygoznı taqip etüvde iştirak etti. Gürina Ukrayına mahkemesiniñ ükmüni açıq şekilde izaatlamadı.
Noyabrniñ 8-ne qadar Qırım Muhtar Cumhuriyeti ve Aqyar Prokuraturası 713 şahısnı devlet hainliginde şübheli olaraq ilân etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
